即食麵點煮？應該無人唔識。想加多隻蛋又點煮？唔係煎蛋就係烚蛋吧！不過結衣BB就話你知原來仲有其他配搭！ 結衣BB多年嚟為即食麵品牌拍咗好多廣告，每次都會喺唔同場景，輕易煮到個日式加蛋麵，快手過電視劇入面煮個麵你食！不過我就唔建議大家喺香港地隨手用雪櫃入面嘅普通蛋直接生食，今次試下整個加料版下午茶先！       材料： 即食麵 1包 雞蛋 1隻 蟹柳 2條 露筍 2條   步驟： 1. 處理好露筍，將蟹柳同露筍切段，發好蛋，備用 2. 按「蒸/煮」功能，同時按「火力」調到最大680 3. 下層煲水，水滾之後放麵，上層同時蒸蟹柳同露筍，按「火力」調到中火400 4. 冚蓋蒸5-7分鐘，蒸完夾起備用 5. 即食麵加入味粉，然後推到一邊，水部份呈月亮形，將蛋液沿住月亮形倒喺即食麵旁邊 6. 蛋花好快就形成，將蛋花放到即食麵上面，再將其他餸鋪喺即食麵上面 7. 按「取消」熄火就完成   小貼士： －市面上買到嘅露筍主要來自美國同泰國，美國露筍較長身同粗大，一般用嚟做西餐。而泰國露筍較幼身同短小，煮嘅時間可以縮短，一般用嚟快炒或者涼拌 －處理露筍先切去最尾大約2隻手指位，因為後段表皮口感唔好，可以稍稍刨去後段嘅皮 －蟹柳其實好脆弱，如果煮麵做餸，建議用蒸或者煎，之後先放落湯麵 蒸菜小貼士： －蒸菜溫度無炒菜咁高，可以保流蔬菜入面95%營養，蒸完依然保留到原綠色 －少油甚至唔落油，熱量同脂肪都會降低 －簡易蒸菜菜式包括：梅菜蒸菜心、蒜蓉金菇、紹菜卷（大白菜）等等 －蒸菜一般5-10分鐘就蒸好，視乎蔬菜種類同切件大小     是次小分享完畢，有興趣可按 麵語錄食玩遊記 by Aminn 或 C家重地 其他分享 :)     Aminn | Beauty．Food．Fun．Travel．Trendy｜    麵語錄食玩遊記 by Aminn (Lifestyle) www.facebook.com/m.for.aminn / www.instagram.com/starzaminn    C家重地 (Parenting) www.facebook.com/sy.lam.family   任何合作請接洽：aminn613@gmail.com