孖吉一歲啦，除左要為佢慶祝外，就係要返健康院打針同檢查啦～ 之不過因為孖吉係預約當日發燒入左醫院（Link: 病在兒身痛在母心之孖吉第一次住院）， 所以被迫要改遲10日去做打針啦。   去到健康院，第一時間要去登記處登記，記得要帶寶寶嘅針卡同健康院手冊方便人員做紀錄。   第一步：量體重 當日下午來到，首先例行工作要磅重啦。孖吉就要除晒衫除淨條尿片，然後上磅量度重量。 注意事項1：2個月以上可以著片片磅重；2個月以下就光豬豬啦 注意事項2：除非太輕或太重(跟據生長線決定)，否則姑娘好少會主動為寶寶度高。   第二步：見姑娘進行健康及發展監察 首先，姑娘會問父/母/監護人一ｄ問題 １）平時邊個負責照顧孖吉？ ２）一日食幾多餐固體，每次食幾多；飲幾多餐奶，每次飲幾多安？ ３）加固情況及進度 餵粥定軟飯？有冇食魚/菜/肉？ 姑娘建議早餐可轉食通粉之類，下午茶食餅乾、麵包麥包、水果、芝士等等。 ４）玩具種類 姑娘建議孖吉依個年齡可以俾洋娃娃佢玩，教佢餵洋娃娃飲奶同餵食；另外都建議俾煮飯仔玩具或積木俾孖吉玩。 ５）說話能力 所以姑娘建議教佢讀下書、睇下認字卡，教佢一ｄ單字，例如車車、水水、餅餅咁。 ６）用水杯或飲管杯 姑娘建議儘量戒用奶樽飲奶，取而代之用水杯或飲管杯飲奶及水。 ７）識唔識得換衫時申出手同腳 ８）會否單手拖著大人步行或扶著東西步行 ９）識唔識得手指指   完成以上問題後，姑娘就會進行一ｄ小測試睇下孖吉嘅小肌肉發展。 小測試A）面前有幾粒小積木，睇下孖吉識唔識將小積木放入小碗中。 小測試Ｂ）姑娘會俾２粒星星餅放係婆婆手掌心，睇下孖吉可唔可以左手同右手都拎到放入口。   最後護士會有小小溫馨提示提醒一歲半再返去健康院需要接受什麼挑戰： １）要懂得指出各身體部位 ２）要俾孖吉玩煮飯仔,　餵下洋娃娃 ３）要多講單字或疊字 ４）儘量唔好俾IPAD同手機俾佢 (依個好重要!!!)   幸運地，孖吉都完成到１歲嘅小測試。之後就去到大人同小朋友就怕嘅打針。。。   第三步：打針 同上次半歲針一樣，要打三枝，分別係： － 十三價肺炎球菌疫苗（第四針） － 麻疹、腮腺炎、德國麻疹混合疫苗（MMR） － 水痘疫苗（第一針） 聽聞ＭＭＲ同水痘針都好勁，好多寶寶因此而發燒。姑娘都提醒話水痘針有機會２星期內出現發燒症狀，所以唔可以鬆懈。   第一枝打係左邊大脾一下，孖吉即刻爆喊；之後第二同第三針係右脾，又喊到癲左。 但打完針出黎後好快收左聲，俾埋佢最愛嘅餅餅佢食仲笑返添呀～～ （感恩孖吉打完依3針冇出現特殊反應或發燒症狀）   之後約埋下一次歲半針同拎埋退燒藥水就走人了～～ ～～～～～～～～～～～～～～～～～～～～～～～～～～ 合作可聯絡: qqyanyan@gmail.com IG Follow: qq_chinchilla 專頁: 孖吉的成長日誌 腳印: MamiBuy Esdlife Ohpama