上個回合，講到啲媽媽生bb展行到躁底，今次講下有啲乜嘢戰利品。 有時真係不得不承認行bb展提要講求策略，如果唔係就未必玩到你心水嘅嘢，或者搶到平貨。 我相信每個媽媽咪bb展嘅心態都唔一樣，有啲人想免費拎嘢、有啲人想買最新最潮嘅嘢、有啲人純粹消遣嚟行下。我就係屬於又想睇新嘢又想拎免費義嚟嘅師奶，所以我都行得好積極。 今年明顯同上年我自己都心態唔同咗，上年陀住個肚，好想儲多啲唔同bb嘢。所以買咗好多唔同嘢，但係到而家都冇用過；今年就唔同啦，今年希望可以換到啲bb現在就要用嘅實際物品。 同埋經過上年嘅經驗今年醒咗，知道要預先登記曬自己想要嘅嘢，去到齋排齋換，而唔係去到先睇下鍾意啲咩揀啲乜嘢。 第一站 - 美素佳兒牛牛帳篷、牛牛杯 大約排隊十分鐘左右，因為有預先登記同埋已經係會員所以好快就搞掂。   第二站 - 惠氏媽媽水彩畫布 大約等咗十分鐘左右就換到，都係預先登記，埋位即刻有得拎。   第三站 - 登記little freddie營養講座 星期五嗰日有媽媽分享，聽完little freddie講座可以送bb食物禮品包。我大約十一點鐘去登記已經排到下午五點鐘先可以聽講座，不過聽完真係攞到禮物。包括每位一包蘋果蓉一包、三文魚容、大約六七包七色米糊同埋一樽puff。我同大巴兩個大人未計迷你，我我哋拎咗兩份返去。淨係呢一站已經補返入場票嘅錢，正啊﹗而且講座內容有啲真係突破盲點﹗正﹗     第四站 - 雅培熊仔 相信呢個係所有媽媽排得最燥底嘅一站。我去到已經係十二點，當時職員話已經截隊，大約半個鐘之後先可以再排。但係啲在場人士全部都冇走開，自己form咗一條informal嘅隊，職員係咁驅散我哋，但係一個人都冇走開，所以我都冇走開一齊排到開隊。開隊嗰陣時秩序非常混亂，有人冇排隊攝入去，但係都冇辦法，我地呢條informal隊係出面嘅人自己整出嚟，所以職員都唔會負責 ，亦令到啲家長有啲爭執。Anyway我都喺嗰一輪入到場，不過大巴就趕唔切，第二輪再排嗰陣啲熊仔已經冇曬。星期日朝早晨早第一站去排都已經冇曬熊仔啦，只係派咗一個水壺連佢哋引以為傲嘅環保袋都冇埋。之後再睇返好多forum 同facebook都有媽媽表示好唔開心，因為登記咗都玩唔到熊仔。 所以我嗰一刻覺得自己都幾果斷，如果真係聽職員話夠鐘先嚟排，真係連條熊毛都冇。     之後就去喜寶HIPP、美贊臣玩下遊戲換禮物，又用coupon book 換下禮物。不過下晝兩點後基本上好多 bb用品食品都換唔到啦，有少少失望。好在迷你我黎到會場都幾high。我哋帶佢去睇bb零食攤檔，佢係咁伸隻手出嚟攞人哋啲零食嚟食，乜都食一餐，都幾得意(貪心，同我一樣)呀。行咗一輪大約四點鐘我哋就搵咗個地方席地而坐，沖咗一包米糊畀迷你我食。可惜佢食咗三分二，剩返三分一就留咗畀我食。之後去到五點鐘聽完 little Freddie 講座之後，就去咗HALL 3 美素佳兒米糊試食站試食香蕉米糊，同埋換左安滿風扇仔，我哋就返屋企啦﹗     ***今年分HALL 1 HALL3真係好唔方便，因為HALL 1 要出場先去到HALL 3，但係再返唔到入HALL 1 了真吹脹﹗