同大家分享生第二胎既速度與激情 回想起第一胎痛左12個鍾先生得出 真係可以話去左地獄一轉再上返來人間 第二胎真係天堂，多謝細豬對我不薄 身邊朋友個個都話第二胎生得好快，但會比第一胎痛 第二胎預產期2018-8-19 8月11號15:00 訓醒已經下午3點幾，同朋友what app 傾計 講起昨晚開始腰痛，個肚有唔舒服，可能係假宮縮 傾傾下唔多對路喔，點解痛多左，咁自己就按下肚同腰，一陣又冇事，重複左幾次，就開始用app計宮縮， 再去個廁所，啊⋯⋯有血絲，心諗要生啦嗎？即刻通知返緊工既老公，一直保持聯絡，我就啦啦聲洗個頭，宮縮開始都密左，就叫媽咪換衫，同我去醫院，老公就即刻離開公司到醫院等我。 17:00左右去到醫院 會合老公就上左s座2樓去登記入院，叫媽咪返屋企先，上到坐係到等姑娘問完我一大堆資料後，就換衫訓上床，醫生姑娘駁機幫我檢查，暫時都係小痛，檢查完，大概一個鍾，姑娘話未得，未穿水未開度數，要上產後房等，應該今晚先生得，咁就推左上4樓等，因為今晚就生得，姑娘話訓走廊，有咩事可以即刻推我落產房。 18:00 探病時間 老公一直係出面等我，咁岩我上得去就到探病時間，老公入左來陪我，幫我按摩下腰，一路陣痛都開始密左，但我都忍到（平時係一個超怕痛既人計打針都會喊既人） 20:00探病時間就完 開始好痛，仲要有便意，叫姑娘過來睇，一直跟開我既姑娘真係好好人，姑娘過到來檢查，已經4指，推得你落去，姑娘即刻拎輪椅過來推我落去，一路嗌痛，姑娘一路同我傾計，一路幫我整起頭髮等我舒服d,佢話應該9點先得架啦，叫老公落去買尿片先（因為未拎bb既野來）然後產房門口等，落到產房搞掂好晒，比笑氣我，一路等，一路等，醫生到啦、幫我放尿同人手穿水，開始進入痛到癲瘋狀態，有d時間得我一個人係個產房入面，一有姑娘入來我就不停問老公係邊，點解買尿片咁耐架（因為老公係陪產）醫生姑娘都不停幫我搵佢（到我之後問返佢去左邊，原來佢誤左姑娘叫佢係產後房果邊等）。穿左水之後就來得好快，我同姑娘講好痛唔得啦，我要痾，當姑娘叫都未叫停我，佢地見到個頭，即刻叫我hold住，㩒住我隻腳，未得未set好野，果一刻產房全部醫護人員手忙腳亂咁9秒9set返好d野，我用力痾左3下阿仔就出左來。當姑娘搵到我老公，佢係產房門口等緊，姑娘話等等，醫生檢查緊，點知一等就等左15分鍾，姑娘出去同佢講，你太太生左啦，入唔切去啦，我老公呆左，咁快。 總結 第二胎真係生得好快，雖然係痛，但痛既時間短，所以對我來講好似冇第一胎咁痛，（竟然依句說話「冇咁痛」出至我把口我都倍服自己）。第二次係聯合生，今次真係好好，因為今次冇比醫護人員鬧，掉返轉比姑娘讚我好識呼吸，今次接生既醫生人靚、溫柔、年輕、又好人，姑娘們又好人，相比第一胎既經歷，今胎依d就係我講既激情。 關於生產過程有咩想知都可以問我，大家可以交流一下，多多指教。