在職媽媽返工要泵奶追奶，放工全埋身，weekend就湊bb返自己屋企(平日我同啡娜喺婆婆度住)全天候對住同照顧。條命再唔係屬於自己嘅，小朋友瞓咗你先可以瞓，半夜無論佢幾點醒都要9秒9彈起身，就算佢乖乖地瞓天光，點都要起身一次泵奶，如果有一晚可以連續瞓到4個鐘，一定要開香檳慶祝。 復工6個月黎，每日返工放工係有儀態地擔泥，一個打到實哂嘅1L屋企飯飯盒(為咗減輕負擔，已由玻璃食物盒轉為膠盒，喺公司番熱時先轉玻璃盒)，奶泵配件，冰袋冰種，除咗重仲係大大件，所有靚靚輕便手袋已經被打入冷宮，又因為之前抱啡娜時姿勢唔啱，得到媽媽手，膊頭緊，腰酸痛。 自己奶量好一般，從來都無冰奶，只有多一至半日存貨，已經有一段時間追唔切啡娜食量，星期六，日假期都唔能夠鬆懈，一有機會就要泵奶儲奶留番黎緊一星期我返工時啡娜嘅食量。雖然同宜家相比起有咗啡娜之前一共瘦咗8磅，但我食嘢反而多咗好多，最高峰期午餐，晚餐各2大碗飯，2-3碗湯，早餐有時係薑醋撈飯，半夜起身餵完奶又係食飯同飲湯，為咗有氣有力造多d奶同埋盡快令身體復原，真係試過一覺得餓就即刻見暈。 每個人體質唔同，坊間好多媽媽試過會爆奶嘅食品，榴槤，椰青，上奶茶，我通通無效，唯有靠自己努力定時定候泵奶，又試過去按摩通淋巴，又試過食中藥補氣補血，都無乜成效，加加埋埋可能貴過買奶粉錢，花咁多時間，心思，金錢，只想將我最寶貴，最適合bb成長，最天然嘅人奶俾佢。每一滴人奶嘅營養同價值唔止係我每日所食嘅supplement，食物，補品嘅價錢，而係我一生以來建立得黎嘅成果，我覺得每一滴都貴過金粒，多謝啡娜婆婆!