裕喬喬病左呢幾日，個人呆滯又冇咩胃口⋯⋯做阿媽梗係搵d好野俾佢食～～做左人老婆咁耐，真係入街巿既話，十隻手指都冇⋯⋯呢排為左阿仔，真係幾怕都要去⋯⋯因為佢d菜堅靚，都係多得媽媽谷既靚媽介紹～星期日老公湊住阿仔，咁我就可以抬好多菜番去慢慢食，數下買左咩先：黑茄、珍珠洋蔥（超方便）、黃色甘筍仔、紫皮紅芯甘筍仔、粟米（貴但堅甜）、油麥菜（清炒好甜）⋯⋯⋯⋯跟住見到羽衣甘藍好靚仔咁同我揮揮手，好明顯叫我買埋佢啦，老板見我眼甘甘咁望實棵菜，就介紹我買紫色既羽衣甘藍，話甜d添架，仲話叫我買少少試左先～咁好既野，梗係要同大家分享下啦～～ 羽衣甘藍既好處多不勝數，今次揀佢最主要係可以增強免疫力同埋佢本身含有豐富既B胡蘿蔔素、維他命C, E, K、鈣、鐵、鉀等等，對裕喬喬康復一定有好處～～而紫色既羽衣甘藍比原本綠色既，多左花青素，又多左份甜味～冇得輸呀～ 最好既食法一定係新鮮做沙律咁食，但裕喬喬得19個月，又唔想俾佢冷食，咁只好黎個快煮啦～～配上靚菜既又要有營養既，就係雞蛋～2樣材料就可以煮一味餸喇～～ 材料： 日本雞蛋 2隻 紫色羽衣甘藍 適量   做法： 1. 羽衣甘藍洗淨切碎 2. 雞蛋打成蛋漿 3. 開鑊落油，油滾左就落羽衣甘藍炒2炒，之後落蛋漿煎靚仔，跟住反轉再煎熟就可以上碟    煎好左喇～～   裕喬喬大大啖食喇～～yeah~~   P.S.1. 羽衣甘藍的莖比較硬，我淨係揀左菜既部分俾裕喬喬食；另外要注意既係，因為佢葉酸同鉀質都高，有腎病、食薄血藥既人就要留意呀 2. 如果想反得靚靚，可以用個碟幫手反，如果用鑊鏟既話，好易整爛 另外，真心推薦呢間有機菜小店俾大家，叫「然舍」，得將軍澳同西營盤有架咋～～有本地有機菜，亦有外國有機貨～老闆仲好好心機教我地呢d新手媽媽點煮，呢個煮法都係老闆平時做法黎～除左菜菜，仲有本地雞、雞蛋同豆腐買架～～ 香港人梗係食香港菜！！良心小店更加要支持！！ FB PAGE: https://m.facebook.com/naturalcorner.hk/ 我家裕喬的PAGE, 媽媽盡量每日UPDATE喲~ https://www.facebook.com/JacoYK/