親子福音呀！據問科學館兒童天地已經俾強國人徹底淪陷，不過最新呢期新開的香港兒童探索博物館，絕對更好玩好有Heart！ 香港兒童探索博物館就位於北角港鐵站A2出口(即新光戲院後面街華滙中心)，一出過馬寶道對面就見到非常方便。 大大個入口冇可能搵唔到。 好高興今日接受他們的邀請，帶埋小孩前來玩玩。 入口上一樓就經過呢句"Quote"，負責人希望小孩透過遊玩去學習，更重係「學會怎樣學習」。 不錯呀，小孩可以藉好多不同方面去學習，不竟仍然是家長去安排好環境讓他們去學，但若果小孩很中可以學習到自己去發掘尋找方法，學會怎樣學習，這才是創辦人希望所達到的目標。 所以博物館提倡非指導式的遊玩學習體驗，鼓勵家長俾兒童自己去探索思考如何學會玩各項設施 (心想求之不得...哈～) 當然不是叫你坐一邊撳電話，大家還是要陪同小孩去玩。 館佔地6,600呎，設置了四個主題展區，分別係「漫遊小香港」(只適合3歲以下小孩)、「故事小舞台」、「愛耗大自然」及「小工匠工作室」，提供超過40件大型互動展區，適合不同身心發展階段。 依家咁流行 S.T.E.M.，在香港兒童探索博物館你接觸到的何止S.T.E.M. 可以話係 S.T.R.E.A.M. 包含科學、技術、閱讀、工程、藝術及數學。 館內提供多個儲物櫃，每個只需$5作按金，使用完可以取回。 大家都要記住着襪，因為某些區域係要除鞋先入得去玩。(當然館內都備有可供購買) 自備水樽可以到館內水機斟水飲。洗手間就設於入口附近。 也設有嬰兒車存放處及育嬰區。 香港兒童探索博物館收費不算貴，一天有三節時段，每時段2.5小時，之後有1小時清潔。負責人強調館內清潔十分緊要，所以每週一會進行大清洗，俾家長同小孩都玩得安心。 一進場就係左邊「故事小舞台」及右邊的「漫遊小香港」。 由於哥哥同芊芊都超齡，所以都冇佢哋份。唔知係咪真係佢哋大個，佢哋從冇問過話要入去裏面玩，事實證明佢哋已經唔啱玩，我拍幾張照就快快離開去其他區玩。 不過場景佈置還真的好靚！可以同小朋友在這學習一下認識我們的香港。 「故事小舞台」呢邊好得意，可以俾小朋友學習設計Storyboard，你哋兩個終於有機會做下我平時番工嘅工作啦！ 呀芊設計呢齣係「大白鯊」嗎？ 畫好哂場景就要同朋友仔試下正式演出！爸媽都企喺舞台出面欣賞小朋友預備的。 呀芊呢齣自編自導自演的「大白鯊」要開始啦！ 一出場就係大白鯊。 然後就同朋友仔的大肥鴨大戰一場，最後肥鴨俾大白鯊食咗，呢齣戲真係夠哂暴力血腥。(滴汗) 哥哥就去咗體驗報導天氣。 企喺綠平幕前，然後揀選自己需要的背景。 喂！點解天氣報告變咗魚樂無窮㗎？哈哈哈～ 唔知做咩跳起舞上嚟，我諗為咗解除尷尬場面吧！ 整個館不單止提供一個娛樂地方俾小朋友去玩，從中仲有好多環保教育元素，像這個樽蓋的特色裝置，小朋友可以用不同顏色的樽蓋去美化環境。 (多謝「跟著莫莉去生活」提供此照片) 再行入去見到「水之源」區，全部小朋友見到有得玩水都即刻超興奮。 呢個設計都充滿香港特色，就係平時在維港見到，好代表到香港的紅帆船。 小朋友可以先著起館內預備的圍裙 (溫馨提示：小朋友可能會玩得好CRAZY噴到件衫濕哂，所以最好都係自備多一套衫褲俾小朋友。) 其實真係好難得香港可以有場地提供這款有科學實驗性的玩水裝置，喺我印象中想玩這類裝置都只有過大海去澳門科學館先有得玩。 哥哥同芊芊都連番做咗好多個小實驗，看上去似玩水，但係其實佢哋遊戲中已經學會了些知識。 這個水龍捲，只要往下撥著鐵片可改變它的狀態。 再來到「愛耗大自然」呢度可以俾小朋友在不同方面去認識一下大自然，先嚟就梗係要去保育一齊慳電啦！ 一家人合作去關掉所有電器，減低能源消耗。 完成就會有個Party波起哂音樂俾你跳舞，芊芊就反而去捉射在地上的閃光。 攀爬設施少不了，可以俾小朋友放下電同訓練佢哋手腳協調。(事先聲明呢度唔會有波波池架，創辦人希望小朋友來到這裏是探索學習，而非Party Room來開心下就算) 好動的小馬騮最適合在這玩。 設施非常安全，家長可以放心俾小朋友在內爬來爬去。 一動不如一靜，在攀爬區旁邊有個閱讀區，哥哥最鍾意睇書，玩完都要過嚟抖一抖睇下書。 鍾意科學的小朋友，可以過嚟顯微鏡探索一下不同的昆蟲標本。 唔好以為呢個係百子櫃，其實裡面放着好多唔同物件，可以俾小朋友仔細去研究探索。 小朋友呢個時侯可以專家上身，用放大鏡同其他工具，去寫番個詳細報告記錄一下岩石資料。 我最喜歡的就係呢個「地形隨心塑」，小朋友可以堆砌小沙丘，裝置可感應沙丘的高度，越高就按圖示模擬了山的最高點由紅色轉為白色，這科技超COOL超厲害。 相反若掘一個坑就代表是這個地方向下凹弓 若將手放在沙上面，裝置感應到這個位置被遮蓋，就會開始形式雨點，降到影象上形成一個湖。 館內某些設施有分時段性開放，好似這個就係其中一個，每20分鐘會小休10分鐘，讓職員清理一下，亦可以不要讓小孩玩得忘形了。 雖然芊芊錯過了一次，但係好快又再開始另一場，可以跟楊小寶及小暴龍一起來個低年齡層組別。 最後來到「小工匠工作室」亦係哥哥芊芊留喺度最耐，用上最多時間玩的一個。 楊小寶年紀小小就可以自己做出一個管道設計，將波順利送到往下的位置。 (多謝「跟著莫莉去生活」提供此照片) 哥哥來這DIY一個飛行裝置，然後放進風管內進行測試，看看可否被吹起。 試了幾次之後，佢發現有些物料雖然好重(好似紙皮)，但係原來配合其他物料，或者將佢塑造其他形態，都有機會可以被吹起。 真係玩到唔捨得走，仲將呢個自己有專利的飛行裝置帶埋番屋企。 另一邊亦可以試做小木工，體驗一下上螺絲及安裝。 芊芊都係要睇住哥哥偷下師。 小朋友可以在玻璃牆上盡情地畫。 這個同樣分時段開放，好讓職員清理一下，再讓其他小朋友可以重新上色。 仲有測試你觸覺及嗅覺的小遊戲。 究竟你會摸到咩呢？ 小朋友又會聞到咩味呢？ 仲可以做自己喜歡的小紙偶，有些像皮影戲偶似的。 芊芊成功創造了屬於自己的....龍....魚.....怪獸吧！ 仲有個燈影區，可以俾小朋友自己探索一下光與影的關係，發揮創意。 全年至愛極力推介的新熱點，各位爸爸媽媽快D帶小朋友嚟玩啦，可能會成日撞到我哋㗎！我已經應承咗佢哋一定會再嚟！ Photo by Sony A7III FE 28mm F/2 想跟我去體驗其他活動，快D報名親子團，同埋留意專頁公佈詳情啦！ http://goo.gl/forms/CNZMEPoMIWkouK8o2 呀劍評分: 10分 呀劍評語: 認識了創辦人跟她談了一段時間，就明白她的理念及知道她放了多少心思時間在這個館上，真誠的希望讓小朋友們在這學會怎樣學習，自己發掘探索，向「被安排」說不。 地址 北角馬寶道28號華滙中心一樓 時間 星期二至日及部分公眾假期9am – 6:30pm（逢星期一休館） 收費0-12歲: 平日 $90 / 周末及公眾假期 $110 13-64歲: 平日 $60 / 周末及公眾假期 $70 65歲以上長者: 平日 $20 / 周末及公眾假期 $25 網上購票 https://www.art-mate.net/doc/51421 (以上資料更新至文章當日) Facebook專頁: 呀劍萬帥 kimfamilytravel Blog網誌 : www.kimfamilytravel.com
