當了10星期全職媽媽, 再過了10星期在職媽媽, 實在有感而發。   無論是全職媽媽還是在職媽媽, 都是很偉大的!         蘇蝦媽媽要繼續當在職媽媽, 卻發現有以下幾個情況會好易被牽動情緒。             1. 聽到別人講”你都係交個仔俾人湊, 有幾辛苦呀” 蘇蝦媽媽心聲 :  當我番工既時候, 蘇蝦係交俾婆婆湊, 但唔代表我好得閒HEA做。每個人番工都有工作, 有糧出就自己要付出架啦。就係知道自己想準時走, 所以OFFICE HOUR 要拼命做晒D野為求盡時收皮番屋企陪個仔。番到屋企陪玩,做家務, 當以為放工就可以輕鬆既時候, 其實先係在職媽媽最忙碌的開始。 星期五晚就可以湊蘇蝦番屋企, 雖然好攰但可以見到蘇蝦笑, 同佢玩真係攰到訓唔著都抵。   2. 你自己唔湊個仔, 睇唔到佢成長, 好多moment 都會錯過左, 唔好為左賺錢而放棄左個仔既第一次 蘇蝦媽媽心聲 :  我都想見證蘇蝦每個第一次。若果我係唔憂生活, 我當然可以咁做。又唔可以話, 我依家唔做野就會無飯開, 但我有工作, 我可以俾蘇蝦更好的生活, 好多事唔係左計右計。當蘇蝦越來越大, 用錢既機會就越多。為左陪佢多D,  星期六日我一定會自己湊佢, 俾佢知道爸爸媽媽唔使番工既日子就可以一齊玩。 放假就可以帶蘇蝦去街去游泳做按摩, 等蘇蝦記得同媽咪咪出街的點滴。   3. 見到蘇蝦鍾意痴公公婆婆多過自己 蘇蝦媽媽心聲 :  初時真係會覺得傷心, 點解個仔唔係咁痴我。但在蘇蝦角度諗, 婆婆係主要照顧者, 蘇蝦每日都見到婆婆最多, 有咁既情況出現都好正常。若果我番工, 蘇蝦有安全感, 對佢成長好有幫助。大前題係, 公公婆婆真係好錫蘇蝦。   4. 望住自己個肚腩覺得無奈/俾人話肥 蘇蝦媽媽心聲 :  有邊個唔想靚, 唔想有好身材做個靚媽 奈何放工就要照顧蘇蝦或者做家務, 私人時間係0, 有時間都訓下啦。 唔係懶唔係搵藉口, 係覺得有D野比自己外表重要, 呢樣就係媽媽的偉大。     如果問我,有冇諗過做全職媽媽,  我會答 : 有, 不過好快就打消左呢個念頭。   原因有幾個 :  1. 過幾年蘇蝦番學之後再番工, 競爭力會下降 (蘇蝦媽媽行業係咁) 2. 婆婆照顧蘇蝦令我可以好放心工作, 雖然係會掛住但唔會擔心 3. 蘇蝦爸爸唔使咁大壓力養家        請Like我地Facebook 會有更多更新既消息架!  Facebook：https://www.facebook.com/socnine/