呢兩年人生面臨翻天覆地嘅改變，從一個人，變做兩口之家，襯住12月3號「123」呢個日子，正式同大家宣布，陳小B已經喺我肚入面啦~   「HELLO各位哥哥姐姐UNCLE AUNTIE，我叫包包，因為爸爸媽媽發現我存在時仲係粒細胞，太細個照唔到搞到有點擔心，所以爸爸話叫我做包包﹗」 更多包媽孕期分享，請FOLLOW： 雲妮手札 https://www.facebook.com/winnie810corner/ 頭3個月未穩定，傳統上又「怕BB小氣」，只有少數家人同包包契媽SSS知情，其實已經發生過好多好多事。大家仲記得十號風球山竹嗎？當日包爸要返工，包媽要Home office打稿，但兩間房窗口都漏水，全日不停抹窗扭毛巾倒水無限loop，加上屋企被吹到左右搖，到4、5點包媽已經累攤了…… 翌日包媽以為自己period到，點知再過多一日，同平時m come情況略有不同，驗一驗之下驚現兩條線﹗﹗ 然後入院，隔日抽血驗HCG，終於照到胎囊……就好似打機一樣，一關過完又一關……流啡兩三次要瞓床休息，自6Wks起日嘔夜嘔，高峰期一日嘔12、13次，嘔到胃抽筋已成家常便飯……連醫生都話：「只要唔係毒品或者毒藥，你食得落乜嘢就盡量食啦……」 身邊無朋友試過咁嚴重嘅孕吐，除咗聽下我呻，都努力搵書問醫生，食梳打餅、朝早食飯樣樣都無咩用；長胎3寶：雞蛋、鮮奶、牛肉，得返牛肉食到其他都食幾多嘔幾多……問過媽咪當年嘔到3個月就停，但奶奶係嘔到入產房-.-   瘋狂孕吐下，懷孕後輕咗少少，顯得個肚真係有點大哈哈~ 有BB後先知媽媽到底可以有幾堅強，嘔到胃抽筋嘔到再辛苦爆喊，都只係怕包包唔夠營養，成日摸住肚話：「媽媽嘔唔緊要呀，明知會嘔(好似好嘥米飯…)都會努力去食，最緊要你吸引到足夠營養，健康出世就得啦﹗」千其唔好信3個月後就無事，因為我到今日仲嘔緊……自問已經相當正能量面對一切，已經打定輸數要嘔到生，早咗完結當BOUNS……但求包包吸收到營養，嘔就當我提早減磅啦~ 有咗之後經常不自覺放隻手喺肚前面 孕吐媽媽們，一齊加油﹗ 如果覺得有用的話，留言同我講聲加油或者留個腳印，我就已經好開心啦 =) ***************************************************** 包媽雲妮有多重身份：新手孕媽，娛樂小編，主播，活動主持…… 邀稿│出席/主持活動│試用│試玩 歡迎inbox FB PAGE雲妮手札 聯絡 更多分享 請follow Instagram : Winnie810hung FB Page: 雲妮手札 https://www.facebook.com/winnie810corner/