可以話學習 ‧ 玩樂 ‧ 飲食於一身的全新親子好去處 Campfire Campus，除咗一般小朋友啱玩之外，就特別適合好似我呢款湊住一盅兩件一大一細的家庭，大就入去上堂，細就留遊戲室玩個夠。 其實早於暑假期間已得知Campfire Campus開幕，但一直都未搵到機會到此一遊，所以等了又等，到今個聖誕前夕，終於可以同兩兄妹來吃喝玩樂。 除咗兒童遊戲室內的粉紅粉藍波波海最吸睛之外，呢度的親子餐廳After3都係賣點，餐點都好好食喔！ 而且遊戲室的沙池都係採用不貼身的幼沙，玩得也非常方便。 Campfire Campus的地點在Google map上很快便找得到，一出將軍澳港鐵站A出口轉右過對面馬路，直向天晉2及Parkside方向步行若5分鐘。 然後到至善街的翠河餐廳旁邊小路轉入... 大家可從THE PARKSIDE乘升降機上到商場1樓，或者於旁邊正門進入... 乘扶手電梯上去就是了。 先談談這個Co-learning的概念，就好似一個教育中心，讓各大小教學機構加盟進駐，由呢條走通道行入去，可見有好多不同課目及興趣班可以報讀。 這些教學機構再會與場地合作，不定期舉行活動及優惠，呢個概念實在好厲害喔！ 而餐廳則用上木感簡約的設計，整個氣氛都好舒服好Warm呀！ 依家仲做緊優惠，食滿$150就送遊樂場玩1個鐘，不過到年尾咋！ 餐廳另一邊(遊樂場外面) 都有好多型格傢私，可以俾家長們等小朋友興趣班落堂時打發吓時間，喺度嘆番杯After3咖啡肯定叉番電！ 入場朋友要先睇睇守則呀，著襪唔著鞋呢D大家知規矩啦！ 場地唔算大，但係應有盡有，波波池、攀爬區同沙池區最大，可以俾小朋友足夠空間周圍玩。 攀爬區頂有個小木屋，小朋友就當係秘密機地，一開始入到去我都搵唔到哥哥同芊芊，原來佢哋就匿埋咗喺度！ 我家哥哥都越嚟越大個，呢類遊樂場地都開始唔受佢玩，不過見今晚冇其他人，先至俾佢入去玩一陣啦！ 呢個釣魚區有幾支魚竿俾小朋友玩吓釣魚釣鴨，芊芊就走咗去動物區釣大老虎，真係威！ 波波池好大好深，可以成個人匿喺下面，係咪見唔到佢哋呢... 講到波波池，好少有見到係用鐵皮瀡滑梯，好有一種親切感，而且鐵皮滑梯會玩得更刺激！ 你睇吓幾有速度感！ 又要講多次...呢個顏色組合的波波真係好靚！ 充滿太空感的沙池，小朋友完全可以全身落去玩，沙的質地幼細一點也不黐身。 場內仲有好多個小梳化空間，可以俾家長坐喺度休息下。 另設有小廚房同小帳篷，都係小朋友至愛的玩意。 亦有洗手區可以俾小朋友玩完洗洗手番去餐廳開餐。 洗手間同樣非常乾淨通爽，大家都可以舒舒服服，準備去吃餐喔！ 餐廳都盡用木製傢私，還設有小孩專用桌子。 好細心的將每個枱角都包上軟墊，防止小朋友走出走入撞倒。 餐飲一D都唔馬夫，價錢合理，仲好好味！ 玩完大拆一餐，對小朋友嚟講真係好滿足！ 嚟緊After 3仲有聖誕大抽獎，獎品包括： 大獎：特大華麗薑餅屋價值$888 （名額1份） 中獎：星星造型/聖誕樹薑餅禮盒（名額2份） 小獎：聖誕曲奇餅禮盒（名額3份） 快D去參加 http://bit.ly/2rHdDs1 這味燒雞切開原來仲釀入菠菜。 餐廳還有個鋼琴俾大家自由彈奏，當然認真彈唔好變咗噪音啦！ 哥哥都忍唔住要露兩手。 Photo & Video by Sony A7III FE 16-35mm F/2.8 想跟我去體驗其他活動，快D報名親子團，同埋留意專頁公佈詳情啦！ http://goo.gl/forms/CNZMEPoMIWkouK8o2 呀劍評分: 10分 呀劍評語: 一個高質的兒童遊玩空間，環境及各樣裝置設計都非常美又安全，可以好放心俾小朋友盡情玩，當然最開心係可以有埋餐廳，小朋友可以又食又玩。配合教育中心這個經營概念，更可以讓各不同年齡層的小朋友及家長到來。 Campfire Campus遊樂場 / After 3餐廳 地址 將軍澳至善街The Parkside商場1樓 電話 3618 9038 / 6113 3417 收費 星期一至五: 1大1小 $88/1小時, 另加大人$50位 星期六, 日及公眾假期: $108/1小時, 另加大人$70/位 After 3餐飲滿$150可以一大一小到遊樂場免費玩1小時（優惠至12月31日） 網上訂座 https://campfire.work/co-learning/tseung-kwan-o-booking (以上資料更新至文章當日) Facebook專頁: 呀劍萬帥 kimfamilytravel Blog網誌 : www.kimfamilytravel.com
