婚前早已同胡生有共識，婚後將會兩人世界一段時間 待升職後先會展開人生另一階段   我一直希望30歲前生產，亦希望生大B 更希望BB可以喺雞年出生   好幸運，一切都喺我計劃之中 今年年頭，我順利升職，4月展開人生大計 第一個月，因為剛升職，壓力太大 就算喺危險期嘗試都失敗咗   第二個月，同樣計啱日子再試過 打算如果幾個月都唔中的話就去睇中醫，調理一下 誰知第二個月就Bingo咗 確定懷孕後，諗返轉頭 Bingo後嘅第一日，我飲咗杯含酒精飲品 而Bingo咗兩個星期左右，諗到食咩就一定要食到 點心、拉麵、鰻魚飯，食完就會超滿足   而且返工成日覺得條腰、對腳好攰 當時都有諗過自己係咪有咗 不過未到下一次M期，我就無提早驗   咁啱喺M期前幾日，同同事傾開 同事啱啱生完，分享咗佢嘅懷孕、陀B經驗 佢話其實有咗，未到M期已經有先兆，實有嘢唔同   所以M期第一日，見未嚟，我就買棒棒驗 點知真係中咗，當時我人在外地 無即時話比胡生知，打算返到香港先比surprise佢   下篇將會講，如何將Good News告知胡生 待續...