話說由婚禮當晚開始，新人聽得最多嘅一定係：「幾時生BB呀？」過時過節更加係日答夜答，有時係想先過下二人世界，有時係試咗好耐都未BINGO唔通又大大聲同你講咩…… B&W一早諗住先過一陣子二人世界，幸運地到我地想試造人時，當月開始試，兩星期後已知Bingo，一擊即中~~當然事前我地有做少量準備功夫，確保身心都準備好迎接小生命。未必人人適用，少少個人分享俾大家參考=) 更多包媽孕期分享，請FOLLOW： https://www.facebook.com/winnie810corner/ 1. 婚前檢查 結婚前其實已經做過婚前檢查，始終下半世有咩事對方都要照顧自己，CHECK清楚好啲嘅 【B&W手札】Ep.81 --- 婚前檢查·向另一半負責任 到婚後B生B太都心廣體胖，幸福肥指數急劇上升……加上身邊唔少朋友想懷孕先發現有子宮水瘤或卵巢多囊症等問題，造人前又CHECK下啦~ 今次加錢做埋下腹盤腔位置超聲波，包括子宮卵巢等，婚展加購$430，比平時join平一半！買個安心相當值得～CHECK晒聽埋報告一切正常可以安心造人啦﹗ 詳細分享按此 2. DOWNLOAD備孕APPS 身邊朋友都推介呢個「瘋狂造人」APPS，紀錄返經期及周期日數，會根據輸入資料計出排卵日，及建議同房嘅日子。但當然啦排卵日子每個月有遲有早，想再準D可以每朝量體溫，或者買排卵試紙朝朝驗下就更準確。(有三位朋友用試紙都3個月內BINGO了﹗) B&W都尚算年輕又唔想俾太大壓力自己，並無買排卵試紙日日CHECK，只係單純知邊日排卵，跟返APPS建議日子同房，就成功了，非常簡單大家不妨一試。 更多包媽孕期分享，請FOLLOW： https://www.facebook.com/winnie810corner/ 3. 食營養補充品 懷孕時要食營養補充品好多人都知，但其實備孕時都要食定葉酸啦~根據家計會指引「醫學研究指出，葉酸有助胎兒中樞神經的初期發育，減低出現脊骨缺陷（脊骨裂）的機會，因此準備懷孕的婦女可補葉酸（每天400 微克），孕婦在懷孕的最初12周亦應維持這個分量。」 由於大家唔會知自己幾時BINGO，到驗孕CHECK到時已經懷孕起碼4、5周，所以備孕時就好食定葉酸啦﹗牌子無咩所謂最緊要份量夠400 微克，旅行時平平地買左DHC呢款，香港都有售，大家可以參考下。 4. 檢視家庭財政計劃 幾年前李麗珊喺廣告話：「養大一個小朋友要400萬」就算唔計通脹，又諗住BB只讀資助學校，仲唔會瘋狂報Playgroup及興趣班…即使係天生天養，始終屋企多咗一個人仔，尿片、奶粉(餵人奶都要有一兩罐看門口)、bb床bb車、揹帶等用品……一年要預返5到10萬都真係不為過 仲有懷孕期間，初期攰到無力買餸煮飯要出街食，好似包媽嘔到咁更加煮唔到啦… 【包媽孕記】大聲宣布「我懷孕了﹗」瘋狂孕吐佛系媽媽育成記 買補品買營養補充品、每月一次私家產檢(媽媽們會明白公院淨係摸肚聽心跳係唔會安心的…)，就算公院生BB都大約用上兩三萬，仲要諗BB出世後邊個湊，長老幫手都要增加家用，呢筆數真係要計清楚，錢唔會喺天跌落嚟架…… 開始接收朋友們嘅幸福傳承，包包嘅床仔車仔衫仔都有著落啦~~多謝UNCLE AUNTIE哥哥姐姐﹗ 5. BOOKMARK心儀陪月/婦產科醫生 傳統上頭3個月唔會公開懷孕消息，除咗所謂怕小氣，懷孕初期都真係唔太穩定……不過有好多嘢其實頭3個月已經需要BK定架啦~ 如果諗住請陪月嘅朋友，睇完《BB來了》應該都會好驚請著個地獄陪月員……如果有朋友用過當然最好啦~但剛BINGO又未講得點問人拎聯絡電話呢？ 同埋真係唔好太老定，包媽5weeks時默默whatsapp咗10個陪月，當時只剩3個有檔期咋，Oh my god!!!!! 所以諗住造人就拎定幾個電話就啱架啦~ 而醫生方面當然啦市面上好醫生有好多，但性價比高嘅都會好搶手，例如有家人兩胎都搵嘅一位全城最平醫生，只接剖腹case埋單只需四萬多少少﹗基本上驗孕棒一驗到就要打去book位~遲咗又係無架啦~~ 小小個人經驗分享，未必適用於所有人，但生BB始終係人生大事，早少少計劃下無妨呀~祝大家好孕^^ 相關文章： 【包媽孕記】QE順產27小時全記錄（上）[極長文慎入] 【包媽孕記】QE順產27小時全記錄（中）[極長文慎入] 【包媽孕記】QE 順產27小時全紀錄（下）[產後房&A11私家房] 【包媽孕記】QE順產走佬袋懶人包(實戰後清單) 【包媽孕記】伊利沙白醫院QE L block登記方法及第一次產檢流程分享 【包媽孕記】大愛仙氣孕照(同場加映閨密照靚相) 如果覺得有用的話，留言同我講聲加油或者留個腳印，我就已經好開心啦 =) ***************************************************** 包媽雲妮有多重身份：新手孕媽，娛樂小編，主播，活動主持…… 邀稿│出席/主持活動│試用│試玩 歡迎inbox FB PAGE雲妮手札 聯絡 更多分享 請follow Instagram : Winnie810hung FB Page: 雲妮手札 https://www.facebook.com/winnie810corner/
