雖然小NEMO夠37週出世, 但係佢真係好細粒. 出世得1.87KGS. 所以一出世就要入保溫箱. 淨係係產房見左一面影左相就比護士抱走左佢了. 果下真係好唔開心又好擔心. 一直到我出院佢都仲係加護病房. 小NEMO 一共住左20日醫院, 雖然我坐緊月, 但係真係好擔心又好掛住佢, 所以我每日都會坐車去探小NEMO. 頭3日我係產後房因為無得湊BB, 所以好努力按胸等佢有初乳比BB. 希望幫到BB. 但係3日都係無一滴. 不過無放棄, 一直跟住護士教既方法去按. 又去聽下人奶講座咁.  因為BB 要係保溫箱入面, 佢又未識飲奶. 所以頭一星期我無得去餵奶. 只可以探病時間去睇下. 頭一星期真係好擔心. 小NEMO 因為太細, 唔識飲奶. 飲得好少. 所以醫生就要幫佢插喉比奶佢.  但係有一日佢嘔左啖血出黎, 真係嚇一跳. 醫生即刻同佢檢查晒之後估計係生產時佢飲左媽媽係產道既血, 所以嘔返出黎. 因為咁樣, 佢又飲唔到奶.要吊營養水比佢. 果下真係好心痛,要插手又要插腳輪住黎. 又因為黃膽指數高要照燈. 小NEMO 好曳,會整脫眼罩, 又勁掙起自己, 攪到種豆果度掉左出黎要換. 醫生話學飲奶就係要等佢自己學識, 無人知道佢幾時會識. 過左幾日穩定左開始比我地試餵佢飲奶, 但係仲係要係個箱入面唔可以出黎, 同埋仲有條喉係個口度... 攸豬爸好努力盡量每朝去餵小NEMO飲奶. 有一日突然小NEMO自己整走左條喉, 護士就叫我們試下餵下先, 唔得先再插返, 好彩小NEMO飲到30ML奶,唔洗插喉. 過幾日攸豬爸朝早去餵奶時見到已經出左保溫箱, 攸豬爸既努力無白費到. 出左箱之後, 人奶姑娘就教我去袋鼠抱希望幫到BB. 第一次袋鼠抱係失敗左因為小NEMO 喊到顛左.. 唔比我抱. 好似淨係要爸爸咁. 之後第2日又試過, 好彩肯比我抱一陣. 試左埋身餵, 又係失敗既. 試好多次都唔得, 人奶姑娘便叫我只好泵比佢飲. 所以開始做左泵媽. 但係個量都係唔多, 所以每次都會補奶粉.  夠磅數後, 醫生比小NEMO放假返屋企試下習慣下. 終於20日出院了. 真係好開心呀!