曾經覺得，做在職媽媽有個好處，就係有段時間可以「清靜一下」。起碼返左工個段時間，有人幫手湊住，會無咁辛苦。當然無左bb係會舒服啲，比起ftm，已經叫做有得抖！但身邊都有啲在職媽朋友，大部分嘅爸爸都覺得我地在職媽媽好輕鬆，佢地唔知點解會覺得我地返工、搭車就係抖左唔會攰（男士嘅邏輯真係好難理解LOL） 因為自己屋企無工人，多數都係婆婆幫手湊，返工前要抺乾淨晒啲地方、蒸奶樽、泵奶等等，比平時返工時間都要早成個鐘起身，始終都唔想自己媽咪又要幫手湊，又要做咁多家務吖嘛！返工前就只好自己幫手處理左少少先。 返到公司，又要瘋狂做野，為左減低自己OT嘅機會，真係唔得閒上fb, 覆whatsapp，目的都只係想盡快返屋企見bb！見唔到bb又會心掛掛，個心囉囉攣，又會擔心佢係屋企嘅情況。Face Time返屋企聽到佢喊，又會好想奔返返去！！    返到屋企，已經無得好似以前咁，放低個袋就爬係到抖下。而係會有不同嘅奶樽等緊你去洗，然後又要陪下bb玩（怕佢會唔認得我T^T）、準備固體食物、沖涼等。搞完一大輪，都已經10點幾11點。自己都開始眼訓想訓。如果老公早返，都可以幫手做返少少，但唔知點解，都係會有好多野要做⋯⋯    去到星期六、日，看似係放假可以休息。但在職媽媽依然都係好多野要做，要處理下平時唔得閒做嘅家務啦、執下屋、洗下衫咁。有時做得快手，先可以一家人出去玩下。（但返完工，有時都係會懶唔想郁 唔想出去） 做在職媽媽就會羨慕ftm，做ftm又會羨慕返在職媽媽！曾經以為自己返左工會輕鬆啲，但原來一樣都會好攰好辛苦，但返到屋企，見到佢對住個笑，真係咩攰都消失晒，個心即刻會甜返晒！各位在職媽媽，加油啊！    鍾意我嘅分享，可以Like我地Facebook同Follow IG會更快知道我同小恩恩嘅update架！ Facebook https://www.facebook.com/90sMummy/  Instagram: https://www.instagram.com/minarainlo/