原本約咗17 Aug 返醫院產檢 但因為我唔記得咗，改到23 Aug 但23 Aug又因為「天鴿」襲港，再改期到30 Aug 當日繳費處登記>婦產科門診>度高>磅重>量血壓 今次等都唔洗等就入得去見助產士，very good   今次嘅助產士好好，好細心，解釋得好詳細，亦好候生 講返Oscar check嘅result同上次抽血報告 我嘅缺鐵性貧血唔算嚴重，唔需要食鐵丸 只要食返含高鐵質嘅食物就ok   踏入5個月，已進入穩定期 孕吐、頭暈等不適已經遠離我 但最近陰唇近陰道位置不時腫痛，令我有啲擔心 不過助產士話正常，因為BB喺子宮到長大，撐大咗子宮 血管亦膨脹，所以有脹痛感覺 若果覺得超舒服可以用冰敷/揸藥膏   之後上床做檢查，先檢查乳房 助產士話，孕婦到5個月左右，會摸到乳房有一粒粒嘅嘢 有啲人會硬及脹痛，似塞奶感覺   以我嘅情況暫時正常，唔好做乳房按摩 因為按摩會刺激乳房做奶，但未生產唔會有奶出 所以暫時唔好刺激佢，避免乳線堵塞   之後用人手按壓判斷阿囡位置，再用測心機聽心跳 聽聽下窒機，助產士話阿囡好活躍 郁嚟郁去，仲踢得幾大力 心跳就正常，1分鐘160下   最後攞埋假紙、覆診紙就走得 45分鐘睇完，快、靚、正