28W5D 當日如常返工，返到公司去完廁所發現流啡 好冷靜地同其他孕媽媽同事講，佢哋建議我去睇醫生 lunch後，我就早走，去醫院   到醫院急診室 雖然已經轉到QE產檢，但因為產檢時未見過醫生 未有白色咭仔，我只好到急症室求診 分流後，我轉到急症室嘅婦產科，好快就有醫生睇我 問症、照超聲波，見到BB有心跳，BB無生命危險 但懷孕中後期出現流血流啡，屬不正常現象 醫生要我留院觀察   準備入院 上病房前，先到產房檢查 核對資料、問症、磅重、check BB心跳 姑娘整理好文件，就叫我到普通病房，辦理入院手續   留院觀察 去到病房，唔算多人，只有6成full 姑娘叫我先驗小便，換好衫再等醫生檢查 當時已經係晚上7點，姐姐留咗晚飯比我，等醫生檢查完食 隔咗一陣，著住藍袍醫生同我檢查 今次要用鴨咀鉗檢查宮頸，依家諗返起都覺得痛 突然令我有開刀生產嘅念頭，完全想像唔到生產時會痛成點   而住院期間，頭房有位孕媽媽叫到力竭聲嘶 叫到全個普通病房嘅人都聽到，仲嚇到阿囡喺咁錫我 姑娘不斷叫嗰位孕媽媽唔好嗌，take a deep breath 當然孕媽媽無理，繼續嗌 攪到我更加驚，唔知到時自己會點   不明原因流啡 開鉗Check完宮頸，醫生再幫我照超聲波 詳細檢查後，胎水、胎盤位置、宮頸長度、BB心跳 一切正常，搵唔到咩原因流啡 但其實我估係因為懷孕期間，我經常便秘，用力便便所致 不過醫生話唔關事喎，只好留院觀察，直至無再流啡為止   住院初體驗 檢查完，姐姐就派飯比我 但見到個晚餐，一啲都唔開胃 宵夜每人一包鈣思寶 至於夜晚，瞓得超差，每隔兩個鐘頭就醒一次 同房嘅孕媽媽穿水、作動，姑娘keep check住佢哋嘅情況 宮頸度數開到2度就推佢哋上產房 全晚開燈熄燈、砰砰碰碰聲，令我無覺好瞓   出院有望 第二朝，6am姑娘量血壓，聽BB心跳 8點早餐時間，又係一個唔開胃嘅餐食 我只係食咗個包，同飲咗宵夜時段派嘅鈣思寶 9點左右，再照超聲波，BB並無異常 雖然仲有少少流啡，但情況已好轉，而我亦超想返屋企 醫生巡房時話如果我下午5點前無再流啡，就可以出院   Monitor Myself 除咗去廁所之外，基本上我都無離開過張病床 全日臥床休息，我又keep check住自己嘅情況   午飯時間，餐食終於叫做靚仔啲 2餸1湯1糖水1生果 出院回家去 終於等到5點，我已經持續幾個鐘無再流啡 胡生接我出院，返屋企休息 但返到屋企，原來有一大堆家務等梗我 無停過，吸塵、洗衫、晾衫、洗碗，仲要照顧隻狗   返到屋企，唯一好處係一覺瞓天光 但出院後一日，再次流血，再度入院 待續...