又係回憶實用文一篇，希望可以俾到少少資訊俾剛懷孕嘅媽媽。 由知道陀沙律B果一刻開始，沙律媽媽已經打算去私院生。 所以一開始證實懷孕，就開始搵主診醫生！ 即係拎左張懷孕證明，證實胚胎著床位置正確。 主診醫生由醫生朋友介紹，係一位靚女醫生。 少少串串貢，但沙律爸爸非常滿意佢嘅專業！ Otherwise沙律媽媽唔會用30分鐘生沙律B出嚟！ 當我發現懷孕果陣係 2016 年 9 月18日。 第一次私家超聲波係同月21日。 拎左張懷孕證明，就可以去番同區嘅醫院登記！ 雖然一早打算私家生，但都要有兩手準備。 政府必須要成為 back up，因為政府醫生 facilities 又多又齊！ 如果萬一早產或出現其他問題，一定要番政府處理。 以下就係私家同政府嘅流程。 政府:  拎私家醫生發出嘅懷孕證明，孕婦ID，住址證明去醫院登記。 登記完，醫院會俾下一個期你見姑娘/助產士，同埋安排你抽血。 安排抽血 [血報告非常重要, 生產時入院用]，通常空肚抽，抽7支血！ 11W左右安排OSCAR [唐氏綜合症篩選]，由政府排期。所以愈早好醫院登記愈好，如非高齡或其他問題，通常會轉到健康院產檢！ 18W左右，到健康院登記，以及第一次產檢。次次去都要帶小便 [清晨第一篤]，因為要驗尿蛋白。基本上健康院都係 self service，到時會有人 instruct 你點做。不外乎都係度高磅重量血壓，見姑娘，聽心跳，約完下一次, 走得 [都可以話好 hea]。頭28W都係6星期做一次產檢，之後就4星期一次。 20W左右，政府會建議孕婦自行到私家診所做結構性超聲波，如果高齡/有其他問題，政府都會排期免費做！ 24W左右安排番醫院做血糖測試 [糖水測試]，大多數孕婦都需要做，但亦聽過某啲唔使做。高齡以及上一輩有糖尿家族史嘅孕媽媽一定要做呢個測試。 28W左右，開始4星期一次番健康院產檢。  35W-37W安排做B鏈測試！   私家: 預約左心水醫生，去到診所都要簡單登記。  每次醫生都會幫孕婦照超聲波 [每次HK$800-1,000不等，或者更貴]，順帶問下醫院喺邊間醫院掛診，收費如何，開刀順產價錢差幾多，如果早產，私院幾多周會接！通常都無一個實價報到俾孕媽媽，只有大概價錢！  見完第一次，醫生會要求孕婦頭30周要4星期覆一次診，而且會講解幾個重要檢查，例如 OSCAR/T21, 結構性超聲波，血糖測試，同埋B鏈測試。全部都可以喺私家做，但好貴！如果政府有得做，可番政府做，再申請reports，每次產檢都要帶小便 [清晨第一篤]！ 11W左右做唐氏綜合症篩選，政府免費做OSCAR ，私家可自費做T21 [HK$6,500左右，或者更貴] 或NIFTY ，但做得愈多，會增加假陽性 [但沙律媽媽兩樣都做左]！ 20W左右，做結構性超聲波 [HK$3,000或以上]，如胎兒有問題，一定要24W之前做決定 [因香港法例24W後不能墮胎]。 30W-36W，每2星期覆一次診！ 35W做B鏈測試，可以番政府做，但視乎政府排期排到幾多周做。政府唔會俾番report孕媽媽，如果孕媽媽中左B鏈，而又喺政府醫院生，醫院會喺生果陣幫孕媽媽打針。如果私院生，建議私家做埋B鏈，因為主診醫生一星期就可以收到report，政府要一個月先申請到report！ 37W-40W，每星期覆一次診！   CONCLUSION: [政府] 費用基本上全免，如果你係高齡或有其他特別問題，更加可以係政府做埋結構性超聲波 [政府] 如果去QE做開產檢，QE會幫全部孕婦做結構性超聲波  [如果排到期]！ [政府] 除左OSCAR & 結構性超聲波，唔會幫孕婦照超聲波！ [健康院] 頭28-30周都係6星期產檢一次，無得照超聲波！ [健康院] 安排免費 35W-36W 做B鏈，reports 唔會俾番孕婦！ [健康院] 因為沙律B 34W 發現臍帶纏頸，健康院同我講佢地只係 back up，幫唔到，叫我去醫院！ [私家] 費用下下都千千聲，每次超聲波 HK$800-HK$1,000不等，或者更費，但可清楚知道胎兒發展同埋可以擁有超聲波相做紀念，同埋可以睇到有無臍帶纏頸！ [私家] 唐氏綜合症篩選亦可以做T21/Nifty [99.99%準]，但要最平要HK$6,500左右！ [私家] 結構性超聲波最平都要HK$3,000左右，基本上照完，胎兒無事，就可以BOOK私家床位！ [私家] 健康院安排36W做B鏈，沙律媽媽個醫生建議 35W 喺私家診所做，因為出report要一星期，如果健康院36W先做，37W先有report，驚早產，所以愈早有report愈安全，私家做B鏈 HK$1,200。結果私家B鏈 report 未出，沙律媽媽已經生左，所以生果陣都打左抗生素打底！so far 沙律B出左世之後都健健康康，除左出世時輕左啲之外！   懷孕35W3，沙律媽媽總喺政府用左HK$140！ 申請左2份 reports，一份血報告，另一份係OSCAR報告！ 但私家診所就用左HK$23,000左右。 因為沙律媽媽未到高齡，又無特別問題，政府好多都唔包！ 所以基本上所有檢查都係私家診所一手包辦，非常貴。 由於選擇左私院生，所以都唔會計較太多，因為一生人一次。   但好彩去私家診所檢查，因為34W左右， 醫生發現沙律B臍帶纏頸一圈，要 monitor 住。 必要時會醫生會建議開刀。 所以當日生沙律B，子宮一收縮，沙律B心跳即 drop！ 在場姑娘都有留意到，而收縮藥都唔可以加重，因為驚沙律B有危險！ 好彩，最後都平平安安出世！ 醫生都講，沙律B出世時，條臍帶都係搭係佢膊頭同頸之間。 即是由34W發現臍帶纏頸，至35W3之間，沙律B自行鬆開左！ 其實果個星期，沙律媽媽日日都同個肚講：唔好再玩臍帶啦！ 如果經濟能力許可，私院生B係一個唔錯嘅選擇。 回想起喺浸會果4日，真係好似渡假咁，因為可能全面休息！   嬰兒用品系列︰ 如何選購嬰兒用品の床品篇！ 如何選購嬰兒用品の初嬰服飾篇！ 如何選購嬰兒用品のSwaddle﹑包被﹑包巾﹑睡袋的重要性！ 如何選購嬰兒用品の消耗品篇！ 如何選購嬰兒用品の奶樽奶咀與配件篇！ 好物&癈物分享︰ 精明買物媽媽系列の嬰幼兒好物分享 III 精明買物媽媽系列の嬰幼兒癈物分享 II 精明買物媽媽系列の嬰兒好物大分享 II 精明買物媽媽系列の嬰兒癈物大分享 I 精明買物媽媽系列の平靚正收納妙法！ 精明買物媽媽系列の嬰兒好物大分享 I 旅行系列︰ 小腳板走天涯の18m布吉旅行應該帶啲咩？！ 小腳板走天涯の如何選擇旅行地點，機票，酒店同其他事宜？ 小腳板走天涯の10m台灣旅行應該帶啲咩！ 自家製系列︰ 自家製系列の給寶寶最好的護理—自製天然健康湯水！ 自家製系列の小兒天然止咳殺菌良方—燉紫洋蔥！ 自家製系列の打一歲針前應該煲咩儲涼湯水？！ 自家製系列の嬰兒都可以食嘅生日蛋糕—沙律B生日快樂！ 教育系列︰ 教育系列のPlaygroup 有感！ 教育系列のPN Interview 有感！ 生產系列︰ 生產系列の30分鐘生產過程+老公陪產的重要性！ 生產系列の早產嬰私院收唔收？生產費用又有咩唔同？！ 其他忙碌日常︰ 加固系列の嬰兒可以食咩零食？！ 健康系列の如何應付寶寶の便秘問題？！ 暗藏細菌系列の選用沖涼玩具時要當心！ 沙律媽媽的忙碌日常の湊B去街應該拎啲咩？！ 純粹分享の在職媽媽補身恩物—老協珍熬雞精！！