喺產房等咗個零鐘，我同BB終於可以落產後病房 胡生攞埋我嘅個人物品跟埋落嚟   我被安排住2人房，落到產後房，姑娘先幫BB沖涼 胡生安置好我嘅個人物品，逗留多一陣就離開 接著落嚟，開始新手媽媽湊B之旅   生完已經無晒力，加上私處有傷口 我都唔係好敢郁，只係臥床休息 而喺生完BB後嘅6個鐘內(即before 9am) 一定要去第一次小便，否則要插尿喉放尿   媽咪千叮萬嚀我要飲多啲水，否則插尿喉會好痛 所以我落到產後房，休息咗一輪 先飲滴雞精，補一補，之後就狂飲水 終於喺9am前去咗第一次小便 然後姐姐幫我洗傷口，執好床鋪，姑娘比返阿女我 但好可惜，個零鐘後，我落床去完廁所，頭暈到hi hi    暈到要坐wheelchair，由姐姐推我返房 姑娘見我暈到咁，就幫我照顧住BB先 我無事先再比返阿女我照顧   初為人母 之 超人力量 以前未做媽媽之前，好驚抱初生B 覺得佢哋又冧又軟又細粒，好驚整親佢哋 但喺醫院生完B唔夠6個鐘，換片、餵奶、哄瞓覺 乜都要自己嚟，絕對無得驚   仍然超記得第一次由床仔抱阿女上手嘅感覺 一鼓不知明力量，令我諗都唔諗，一手抱起咗阿女 抱上手後，覺得阿女都唔係好軟冧冧啫 其後仲愈抱愈上手添   寶寶要睡保溫箱 喺醫院期間，阿女因為體溫低於37度 手腳冰凍，兩次要入保溫箱 直至體溫上升到正常溫度，姑娘先比返我照顧   每更姑娘都會幫BB探熱，但阿女體溫都係marginal 姑娘就叫我攬實啲佢，等佢感受到阿媽嘅體溫 不過仍然無幫助，阿女啲手腳都係凍 阿女不但身型似我，連手腳冰凍都似埋   新生兒代謝病篩查 所有喺QE出世嘅BB，都可以免費進行新生兒代謝病篩查 父母可以及早知道BB會否患有先天性代謝缺陷同智力發育遲緩   阿女出世第二日，姑娘喺佢腳底抽血 兩星期後無收到電話，即代表BB無問題 政府醫院嘢，你懂的呢   政府醫院生B也不錯 政府生B嘅好處就係有好多湊B支援 喺住院期間，差不多每日都有湊B workshop 母乳教授、沖涼示範，只要向姑娘報名就ok 岩晒我哋依啲新手媽媽   我的黃金初乳 陀梗阿女嗰時，睇過一本醫院派嘅小冊子 BB出生時身體已有足夠水份同營養 出世第一日食量較少，所以我一直無用手揸奶   直至阿女出世後嘅10小時左右，姑娘叫我試下揸奶 我先開始揸，試過兩次分別揸到0.4ml同0.1ml嘅時候 因為我拎唔實枝針筒，跌咗落地下   當時我大嗌咗出嚟，勁肉赤 揸得咁辛苦，竟然跌咗落地下 晒曬我啲心機之餘，阿女仲要無得食   除咗手揸，阿女都有埋身食 相信每個B都一樣，開頭唔識埋身食 口仔張得唔夠大，啜到nipple勁痛，又損晒 每次埋身餵奶，都好似受刑咁   明知埋身餵會痛會損，但為咗阿女嘅健康 寧願自己痛，自己辛苦，都要埋身餵 所以媽媽真係好偉大，幸好我嘅黄金初乳都夠阿女食   突如其來的出院通知 喺醫院住咗第3日嘅朝早，醫生巡房 睇完我個病歷同傷口，見我一切正常就話我可以出院 我問：咁係今日定聽日？ 姑娘話：一定係今日 我當時呆咗，今日出院！咁突然！   晏多些少，姑娘話我知阿女都一切正常 收水後重2.92kg，無黃疸 BB可以同我一齊出院   醫院安排咗出院講座比我哋同日出院嘅媽媽 姑娘B清楚我哋出院後要做嘅嘢 包括：攞出世紙、打電話到健康院做檢查等 由於我完全唔夠精神，又怕自己聽漏，所以偷偷地錄音 咁我可以隨時聽返，返到屋企胡生又可以聽   當日媽咪同胡生同我出院 最後我都等唔到上私房就要出院 阿女第一日回家