奶仔依家四個半月大.. 佢由出世到而家都唔係瞓得多嘅BB，而且好難入睡.. 因為呢個原因我上網搵咗好多唔同嘅文章，同埋買咗幾本育嬰書... 希望可以係當中學到點樣氹BB瞓覺!到而家雖然唔知算唔算成功.... 但係佢已經可以食得分到日夜，夜晚食完奶11:00p.m.瞓到第二朝6:00a.m.   今次係希望可以同大家分享下當中試過嘅方法！我深信每個BB性格唔同接受嘅方式都會唔同，唔可以一本天書睇到老! 所以我會列晒我所有試過方法出嚟俾大家參考下     我開頭其實係做壞規矩，都會抱着入睡！ 但比健康院啲姑娘話完之後，決心作出改善！ 首先由環境做起⋯ BB細個係訓分隔床，有自己一張固定嘅床仔（而家大個就訓bb床） 日頭我哋盡量開窗，等自然光曬入屋企，比BB吸收維他命而且俾佢知道係日頭   夜晚臨瞓之前我哋會關燈，床頭會開一棧小夜燈，氣氛昏暗，仲會播柔和嘅純音樂，俾個signal佢知道依家係夜晚準備瞓覺 之後我又買咗隻音樂海馬，我諗好多媽媽都唔陌生～我都係因為媽媽group介紹先入手呢個item，佢係一個公仔嘅音樂播放器純音樂好適合訓前播比bb用嚟聽 安撫神器第二樣就係奶嘴！身邊嘅朋友/親戚一見到我話比奶嘴阿B食....個個好似覺得我害咗阿B咁！但其實大家有冇諗過?我哋細細個咪又係食奶嘴長大，而且曾經我喺網上邊睇嗰一位醫生嘅文章，佢話奶嘴唔係萬惡嘅源頭，亦都好客觀分析個奶嘴可以有效地為BB提供安撫作用！   奶嘴絕對唔係洪水猛獸！所以我一早已經俾咗BB食，佢都好醒目唔會含着過夜，熟睡之後就會自己吐返出嚟～ 安撫神器第二樣就係Baby shusher ！呢個係我無心插柳搵到嘅，因為阿B扭眼瞓成日都會大喊，媽媽我就要用口發出殊～殊～聲音佢先會有安靜！殊得多我都覺得好攰！之後就上YouTube搵類似嘅聲音，點知就比我無意中發現咗呢個殊殊神器。即刻心心眼，喺二手網度買咗一個返嚟試！試完真係好得！10次中有7-8次阿B聽完都會自己肯訓，媽媽我慳返好多口水！   我上網搵咗佢嘅教學點用，我自己習慣每次開15分鐘比BB聽，夠鐘之後佢會自己滅音我得閒先去扭返關機！   呢個神器算係我真金白銀買返嚟最滿意嘅產品之一！     最後一個殺手鐧就係陪伴！因為奶仔好鍾意人陪伴係側邊，有時訓訓下都會打開眼望下身邊有無人，有人就會安心咁繼續訓。而臨訓前我都會訓係佢旁邊，等佢有安全感！而家一般陪伴佢15分鐘就可以自行入睡啦   每個方法我都實測係奶仔身上都係work！希望比大家當一個參考～如果有更好既建議請留言/pm同我分享！謝謝:-)   歡迎邀稿試用//參加活動: Email: Moseskwan0901@hotmail.com Instagram: Little.moses.k Facebook : 奶仔部落格     <br />