四歳多啲個時同Natalie去完健康院驗眼，視光師建議我哋出去再check吓度數，俾咗三個視力檢查地方嘅資料我哋。 拖下拖下，加上原來都幾難book （次次打電話去book都無人聽㗎，要留言，然後會有人打返俾你同你約時間, 可以約一個月內嘅日期），前兩日終於同左Natalie去香港盲人輔導會嗰度驗眼！ 香港盲人輔導會嘅普通眼科及低視能中心交通都幾方便，喺石硤尾地鐵站行過去只需要幾分鐘，行到去大坑西街同南昌街嘅交界就會見到！ 驗眼需時大約50分鐘，程序大約係咁樣： 登記交費（$180）之後，先入一間房驗眼，部機係好似一般眼鏡舖咁樣嘅，額頭頂上，下巴托住，雙眼望入鏡，視光師叫佢望住前面搵Elsa公主????，一陣有公主走出黎，主要係氹佢望住入面，幫隻眼影相，完成之後就出去等。 之後就入另一間房由視光師驗眼：睇幾組圖，有好多顏色中間有雙位數字，亦有一組睇全銀色圖案，入面有唔同形狀，check有冇色盲、色弱。 跟着戴住副眼鏡加入唔同嘅鏡片驗眼，睇英文字母，Natalie大致上都睇到，就係有幾個細字唔肯定，視光師叫佢估下，佢又估啱。 之後視光師就講下驗眼報告同埋有啲建議。 視光師解釋，嬰兒出世嘅時候係有遠視嘅，隨住發育成長，眼球拉開遠視就會消失。如果小朋友好似Natalie咁先天出世時遠視”唔夠”，發育到4歲幾就會有小小近視散光！不過暫時都唔使戴眼鏡，但就要注意同定期半年檢查一次。 視光師建議每近距離睇事物，無論玩玩具、做功課、看書、睇電視等等，每20分鐘就要停一停，俾眼睛休息5至10分鐘望下遠景。日常去多啲郊外或公園都係對眼睛好嘅。 搞掂晒之後就約定下一次返嚟check嘅時間，交埋$50訂金，咁就走得啦～ 如果你哋對小朋友嘅視力有懷疑，就快啲帶佢哋去check下啦。更多嘅資料可以睇番香港盲人輔導會網站：https://www.hksb.org.hk/…/%E6%99%AE%E9%80%9A%E7%9C%BC%E7%A…/ 診症時間 逢星期一至六：上午9:00至中午12:30；下午1:30至下午5:00 逢星期日及公眾假期休息 喜歡我嘅分享嘅話，記住like同follow我個Facebook page呀:) https://www.facebook.com/natalie.nathan.mum/