莎莎2016年11月出世，係人人口中嘅細B，但不經不覺已經到咗19/20 K1適齡階段 究竟細B做超大B好定做細B好呢 喺網上睇過好多人嘅發表討論，都有唔少人傾向超大B 即使有學校讀緊K1，為咗讀中意嘅學校，第二年再讀一次 初時唔知道有超大B競爭，報咗啲超受歡迎學校，不過當中有A++，A+，當然亦有A 非教徒嘅我哋，報宗教學校真係陪跑 不過有教育工作者話住邊同宗教信仰其實係無關係。。。 最終我報咗七間，不過撞到九彩 第一Round有三場，分別10:00am #1, 10:30am #2 同11:20am #6 第二Round同樣有三場，分別9:00am #5, 10:00am #3 同10:30 #4 第三Round就只有一場 12:00 #8 #1, 係莎莎一出世我就話要報，聽聞超多人爭，報名同面試日都會超多人，排長龍，不過，莎爸去報名當日遇唔到呢個情況，而我只係同莎爸一齊去咗聽簡介會，聽完之後，呢間學校喺我心中嘅排名已經跌到第七位，最終我哋係無去見 #2, 係莎莎嘅表哥表姐都讀嘅學校，簡直可以話係家族學校，而呢間學校非常受歡迎又傳統，之但係我對呢間學校一啲好感都無，我見唔到佢嘅升學有咩特別，報佢，只係貪佢多學位，用作後備，所以去咗見 面試當日見唔到長長人龍，登記非常順利，登記完安排咗去玩波波同玩滑梯，大約十分鐘就分組入課室，一組有十對家長小朋友，入到課室，家長同小朋友係分開，老師會喺小朋友玩緊期間同佢傾偈，例如問佢叫咩名 家長就喺後面填問卷，問卷包括咗小朋友生活習慣同埋家長同小朋友嘅活動，之後一個跟一個面見，問點解揀呢間學校，對小朋友有咩期望，點睇家校合作 全程30分鐘。 #6, 初時無諗過報，不過莎莎Pre-school老師推介，咁就報埋啦。點知報名果日，遇著一個無熱誠嘅老師帶領參觀學校，我就後悔報咗名。但之後去聽簡介會，令我有另一番體會，或許係個副校識包裝。所以，呢間都有去見。 呢間可以兩間家長陪同，面試好簡單，小朋友邊玩邊傾偈，亦無乜特別問家長，可能係問卷時已經包晒 問卷包括咗邊個湊小朋友，點解揀呢間學校，同小朋友會做啲咩嘢，點認識呢間學校，小朋友優點 入課室就只有五個家庭，自己揀枱，每張枱嘅玩具都唔同，老師考小朋友都係圍繞枱上玩具 #5, 其實唔多認識呢間學校，不過知道超好口碑，而且近屋企。由於想見完呢間再見到多一間，所以提早8:45am就到，果然係受歡迎，要喺門外排隊，入到去就登記派籌，然後小朋友可以自由活動玩滑梯等等，老師會嚟叫人排隊，一轉有10組家庭，先睇2分鐘影片，然後入課室，一個老師配一個小朋友，邊玩邊問問題，無問過家長嘢，10-15分鐘左右就入另一個課室，係唱遊，老師唱歌，校長睇小朋友反應比分，全程30分鐘 #3, 要搭的士去，嘩，超嚴，夠鐘就關門，無得面試。揀呢間學校全因有全日制。一夠鐘就有少少簡介，然後入課室，老師先講故事睇小朋友反應，然後分組整勞作，當中老師會係期間問問題，完嘅時候係10:30am #4, 本身幾中意呢間學校，有幾間分校，九龍塘係總校，而且係私校，窮人嘅我哋，梗係揀區內有資助嘅分校啦！認識呢間學校主要原因係之前報過N班，但當然之前係連面試機會都無。加上由於之前太天真，以為喺佢哋度返親子班，返咗兩期覺得幾好，之但係。。。後期去開放日發現走咗好多老師，感覺完全唔同晒，早就放棄咗唔去見 #8, 呢間學校報佢都係因為佢小班教學又有全日，之前亦報過N班，但呢日唔多想去見，因為係莎莎正日生日，加上學位唔多，我想放棄，不過莎爸覺得中意就盡任何力，所以呢日由莎爸同莎莎入課室見，過程15分鐘，莎爸話莎莎做唔到 總結 受歡迎排名 教署評級 有無去見 結果 #1, A，缺席 #2, A+, 見咗，Waiting, 求位信後pm offer #3, A, 見咗， direct offer #4, A+, 缺席 #5, A++，見咗，waiting，求位信後無回音 #6, A+, 見咗，reject, 求位信後pm offer #8, A+, 見咗，waiting 我自己有個結論。。。 有N班學校機會微 非教徒報宗教學校都係微