整眉記の 輕氧眉&絲絨眉分享 話說一年前整衰咗條眉，問過好多間整眉舖都話要洗左眉先可以再整返好。膽小既我唔想再承受太多既痛，所以呢一年黎都係靠戴帽，髮型或者眼鏡去遮住。 經過一年後，條眉開始淡色少少，老公又不停話想整。於是終於的起心肝搞搞佢。 上次嘅慘痛經歷之後，真係唔敢再亂搵。因為網上好多相都好靚，但係唔知佢係真實定係改相或者偷圖。做咗一輪資料蒐集之後，最後決定揀老公熟客推薦既整眉師傅。 一黎見佢效果幾靚。二黎店主Apple本身做化妝師，對畫眉一定有返咁上下功力。再加上佢有幾張證書同埋最近去完韓國再進修，令我可以好放心交條眉俾佢。 老公本身有眉毛，只係比較散同埋眉頭眉尾無咩毛。於是Apple就幫佢揀咗絲絨眉(新式手法既飄+霧眉)，完成之後老公真係精神咗好多啊。 至於我就比較棘手。本身條眉係高低，再加上上一手個師傅(精湛)既功力，令我眉毛集深色，高低，線條唔好於一身。 Apple用咗唔少時間先修補到。因為之前條眉真係太誇張喇，最後決定整粗少少去cover 返上一手既顏色同個型。 因為本身仲有上一手既色同我本人既眉毛，所以Apple幫我揀左輕氧眉(新式手法既霧眉)。完成後真係令我好有驚喜呀，我終於有條工整既眉啦。呢個開心既感覺難以用文字形容！總之我以後唔洗用戴帽或者眼鏡遮住。亦唔洗係鏡前面搞好耐先出到門，Happy ShaLala～～～ 值得一提係今次整眉嘅過程同上次感覺好唔同，Apple好細心解釋俾我哋聽飄眉同霧眉嘅分別。另外做每一個步驟都好認真，連我都覺得ok既時候佢仲叫我坐起身望鏡，執啲微細位。覺得自己好好彩呀，遇到一個有良心又細心既整眉師傅！好啦講咗咁多，我哋睇相啦。