繼上年親戚朋友食過都話好食^^ 今年再接再厲⋯ 超鬆化好香牛油味！仲有我最愛嘅朱古力味!食到停唔到口！ 得意造型！大人細路都鐘意！ 四種材料就整到～麵粉、粟粉、糖粉、牛油,味道唔差過出邊買㗎! 食譜：約25小粒分量 金桶無鹽牛油85g(烘焙店、恵康買) 糖粉icing suger 25g(烘焙店買) 低筋麵粉75g（惠康，759買） 粟粉25g(煮餸埋䇜個啲) 1）準備低粉、粟粉 2）低粉、粟粉先過篩備用 3）室溫牛油不用整溶，成舊用電動打蛋器打開約1分鐘 4）之後再打約7分鐘，其間分兩三次加入糖粉打， 打至汜白軟身，（記得唔好攬住個碗邊，熱力會將牛油溶化） 5）加入已備用的低粉粟粉，分兩三次加入牛油度，用刮刀拌勻(用切菜方法一刀一刀輕輕拌入粉類至冇粉粒即可，整個過程大約5分鐘~不要過度攪拌會不夠鬆化) 攪拌到最後，你會覺得隻手勁攰的！咁就啱啦！ 6）預熱焗爐160度，盤中放塊牛油紙墊底，牛油筆入唧花袋造型～造型後放落雪櫃雪5分鐘，將圖案定型！雪左先焗花紋就唔會散晒啦！ 大約可以整25至30小塊 Panasonic 焗爐，有上下火設定，上火150度，下火160度，焗10分鐘（普通焗爐可以先試160度左右） 第一批心急得滯，170度焗左十分鐘，少少啡咗底！因為今次唧得細粒左，所以度數要調教返低啲焗！ 再試過先！上火150度，下火160度，焗10分鐘，再下火轉170度焗7分鐘！完美嘅金黃色！ 睇吓第一批同第二批嘅分別～ 真係唔可以心急㗎！ *記得放涼後先可以試食！如果個心唔夠鬆化仲濕濕地，就要再焗多陣！ 留咗少少牛油印圖案曲奇～ 都係先放落雪櫃雪硬小小先，比較容易做型 放落牛油紙上， 造型得意可愛！一口一粒～食唔停口啊！ 跟住就係做朱古力味，做法同牛油味一樣， 不過粟粉份量就需要調教返，粟粉為20g，朱古力粉5g！ 食譜：約25小粒分量 金桶無鹽牛油85g 糖粉icing suger 25g 低筋麵粉75g 粟粉20g 朱古力粉5g *朱古力粉放埋落低粉同粟粉入邊過篩就得啦！ 牛油同糖粉已經打發好啦！ 加埋朱古力麵粉落去攪拌～ 朱古力味攪拌完成啦！ 末焗已經好香朱古力味！ 放落雪櫃雪一雪定型先！ 成間屋都係牛油香味！超香！ 呢個小朋友等左好耐！終於有得食啦！ 超鬆化！朱古力味小朋友最鍾意！ 放入禮物盒 送俾人一啲都唔失禮㗎！ 入落杯仔度送俾小朋友食～ 賣相一般啦⋯不過味道搭救～好好食！ 老公呀仔兩個食唔停口，好正！ ———————————— Follow 埋 IG啦:https://www.instagram.com/chochomamami/ ———————————— 60款＋幼兒菜式分享(不定時更新) https://www.facebook.com/chochomamami/posts/1156137214530144