新年長假期  來一個突如其來的新春+情人節之旅 為各位媽媽們重點推介三大關西親子遊必去之選 EP2. 包包去哪兒 の 大大大阪 今日我哋嚟到日本規模最大嘅複合式商場ExpoCity 原來哩度係1970年日本舉辦亞洲首次嘅國際博覽會 [ 大阪萬博EXPO 70 ] 巨型活動過後就變咗萬博紀念公園   前往Expo City可坐大阪單軌電車到萬博紀念公園站 經過條大天橋 就會見到右手邊就係ExpoCity 而左手邊就係萬博公園入口 遠遠就可以見到太陽之塔 呢個太陽之塔係由藝術家岡本太郎設計 1970年大阪萬博期間就有超過900萬人到訪此塔 塔內有一項大型展品名為生命之樹 放了約三百種生物既模型 但因為結構問題不再對外開放 直到2018年3月 終於再次對外公開 每日最多只有1200人可以入塔內參觀 只可惜我哋今日都訪時間已經過咗四點半 萬博公園已經關門 所以未能夠玩到園內著名嘅長滑梯同埋到訪太陽之塔   下次一定再會到訪 唯有到此一遊拍照留念 前往ExpoCity就會經過呢個小型遊樂園 裏面嘅小玩意非常吸引 分別有噴水小火車 兒童跳樓機 (90cm以上嘅小朋友可以由大人陪同下一齊玩)   收費為400 yen一個小遊戲 (大小同價) 最吸引就係呢個用上腳踏黎自我操控昇降既飛翔機 包包玩到要encore   ExpoCity內的Lalaport商場有超過300個日本知名品牌小店 時裝藥妝生活雜貨家電應有盡有 應該行三日三夜都未行完 所以有啲家庭計劃行程時  會選擇喺附近酒店留宿 方便第二日繼續吃喝玩樂 跟住我哋就去左三樓嘅food court用餐 有出名嘅仙台利久牛脷同埋金子半之助天婦羅駐埸 拉麵章魚燒丼漢堡 總有一款滿足到你 最特別之處有一個區域 檯同櫈都係專係為小朋友而設 非常kids friendly   跟住我哋就出發去今次嘅重點推介 - NIFREL 活生生的博物館 外觀看似普通既海遊館 但入到去就會見識到一個別開生面嘅水族館 因為佢會透過各種藝術裝置去突出每一樣生物 令每一位變成主角   真係十分適合一家大細花上兩三小時閒逛   票價如下 分別可即場買飛或於網上購票  一入去需要先放下bb車 而活動範圍主要分兩層  第一個區域為*接觸顏色 小魚Mo仔小蝦分別住在緩慢變化嘅顏色世界裏 色彩繽紛既魚仔游黎遊去   睇到包包同細路b目定口呆 第二區為*接觸技能 呢度會見到好多非常特別 前所未見嘅生物 仲有魔鬼魚住在透明既石春上 唔知細佬b見唔見到隱藏喺沙度嘅比目魚呢 包包竟然夠膽試俾魚仔咬死皮  玩完記得洗手呀~ 呢個水族館值得一讚 就係唔會有一陣海洋味 通風系統同清潔程度果真有日本級數 而且觀賞高度o岩晒小朋友  第三區域為*接觸姿態 一般魚缸都係用水草同假埸景 呢個水族館完美演繹藝術魚缸 運用透明亞加力膠 光影配合生物 為佢地築起水族舞台 向前行就係*Wonder Moment 好似Teamlab嘅裝置藝術咁 仿如置身於宇宙星球的神秘空間 約十分鐘的Light show (包括幻變花木 宇宙 光之雨 3D空間等) 等小朋友o係充滿神秘感既藝術體驗中探索 電挮直達二樓又係另一種新體驗 去到第五區域為*接觸水邊 白老虎 鱷魚及罕見的河馬生活於透明視覺空間 為各種動物增添一份親和感 同層另有一個以野餐為主題的cafe 裏面既食物都相當有藝術感 於書本/圖畫中認識的HIPPO  都不及眼前親眼看到活生生的河馬吧 到第六個區域為*接觸行為 完全顛覆咗一般傳統嘅動物園 活生生的動物就喺你周邊飛過或行過 同場嘅動物管理員仲會細心為您解答各種有關動物嘅疑問 例如企鵝點解可以生活o係咁溫暖既博物館內 動物間既相處之道 或從未見過的最巨大鼠科類動物 兩個小寶貝見到活生生的動物在周邊飛來飛去 行嚟行去 真係睇到嘩嘩聲 展館外有一個kids zone 提供一式四款明信片及顏色筆 俾小朋友可以自由創作 離開前會經過一個Souvenir shop 入面有各類精品及博物館內見到的動物化身成為毛公仔 NIFREL  營業時間為早上十點至晚上八點 溫馨提示 - 最遲入館時間為晚上七點 離開ExpoCity時  又會再見到呢個日本第一高摩天輪 Redhorse Osaka Wheel 已經成為Expocity嘅地標   夜晚我哋去咗位於難波本店嘅釣船茶屋食晚餐  *建議當日先致電訂位 等位時見到原來佢哋有一個俾小朋友整壽司嘅workshop (當然需要先預約啦) 以下為釣船茶屋既價目表 唔同魚類有唔同收費 基本刺身 鹽燒 唐揚唔使另外收費 但整手握壽司或其他烹調方法 (如茶漬雜炊釜飯) 就要額外加錢 因為有小朋友關係 所以安排左我哋於房內用餐 職員會提供一支特別嘅魚竿及蝦糧 畀你於房內垂釣 但係應該等到天光都唔會有魚上釣 於是我哋就走去出邊嘅大魚池 職員俾左一支特別嘅魚竿我地( 唔需要用魚餌) 就連包包都可以自己釣到一條小魚(鰺) 用左唐揚煮法 點知包包對於自己條魚自己釣 表示好有成功感 仲話想釣大伊勢海老 於是哩一釣就玩左12000yen (約港幣八百蚊) 換來一盤龍蝦大刺身  非常新鮮  肉質彈牙爽甜 食完既龍蝦殼仲可以用黎整麵豉湯 呢度每逢有人成功釣到 都會有職員大鑼大鼓 而且場地極為闊落 適合一家大細用餐 (仲可以搞大型宴會) 每位消費約HKD$300左右 價錢合理 值得帶小朋友前來體驗 難波本店  預約 06-6212-5882 (FAX: 06-6212-5883) 〒542-0073　大阪市中央区日本橋1-1-13 サンルート大阪なんばB1F 平日 17:00～24:00[L.O.23:00]、土日祝 11:30～23:30[L.O.23:00]   包包去哪兒 ?! 日本篇 大阪親子遊 2019 【包包去哪兒 の 大大大阪 ★ 兒童職場打工日誌 】 東京親子遊 2018 【包包去哪兒 の 橫濱 ★ 麵包超人博物館 】 【包包去哪兒 の 反轉台場懶人包 ★ TeamLab 】 【包包去哪兒 の 東京市區嘆溫泉 ★ 大江户溫泉物語 】 【包包去哪兒 の 日本包車初體驗 ★ HEA遊箱根 】 福岡親子遊 2018 小旅孩包包【福岡親子遊】-Ep.1 小旅孩包包【福岡親子遊】-Ep.2 小旅孩包包【福岡親子遊】-Ep.3 小旅孩包包【福岡親子遊】-Ep.4 小旅孩包包【福岡親子遊】-Ep.5   想了解更多日本住宿/日本包車服務及親子遊行程交流--> 包包陪細佬b看世界 FACEBOOK專頁