BB去到6-12個月開始，就會開始突然之間好怕陌生人。有人會覺得係因為佢哋扭抱，有人會以為佢哋係好細膽。總之一見到陌生人，而爸爸媽媽又唔係身邊，佢哋就會開始爆喊！ 小恩恩都唔例外，係11-12個月，就突然好驚陌生人！我如果唔係我抱住佢，佢自己一個坐喺度，而又有陌生人行埋嚟，佢就會爆喊！除咗抱住佢或者攬住佢先同陌生人傾計之外，基本上係真係一步行唔開！    試過有一次，有朋友嚟屋企，我想去個洗手間，叫朋友幫手睇住，一行開佢就即刻喊。仲要一邊喊一邊爬去廁所門口到搵我。最後搞到我要，開着廁所門去廁所⋯呢一刻我終於明白，以前見到人哋畫嗰啲漫畫，點解去廁所會係抱住個BB一齊去⋯⋯     依加我地好似變左連體嬰咁，無論我去到邊，佢都係會出現係我手上/背後。   呢段期間真係好辛苦，因為你想俾人幫手湊一陣都唔得，而佢點樣都係要黐住你。但同時都會覺得BB好叻，因為佢認得邊啲人係熟悉，邊啲人唔熟悉，識得對陌生嘅人保持警覺係一件好事！就算遇到危險，例如比陌生人抱走，佢都即刻會喊，減低俾人捉走嘅機會！ 想減輕BB呢個症狀，其實都有方法架！我哋可以抱住BB，再同對方傾計，令BB知道呢個人原來爸爸媽媽都信得過，佢嘅戒心都會低啲架！比起擔心陌生人嘅感受，其實BB嘅感受我哋都要顧及，始終對bb黎講呢種恐懼係好真實！否定佢地感受都會令佢更加唔開心！只要我哋同BB慢慢解釋，就可以慢慢舒緩佢哋呢種情況。      鍾意我嘅分享，可以Like我地Facebook同Follow IG啊！比個支持鼓勵我！入面會有更多唔同分享比到大家架！ Facebookhttps://www.facebook.com/90sMummy/ "> https://www.facebook.com/90sMummy/  Instagram: https://www.instagram.com/minarainlo/ 歡迎聯絡(*´∀`)~ 出席活動/廣告合作/開箱/產品試用 Email: iamlorrainelo@gmail.com