近期俾人問到點解會寫 Blog，我諗最最最開初，應該係因為中學西史老師的一番說話。今日過去就成為當日的歷史，你地而家係讀梗一個人或者一個國家既過去。唔知道你地會係名流清史定遺臭萬年，又或者只係平平淡淡，但身邊總會有人想知你的過去，又或者你而家覺得走唔過的路，第日睇番原來只係少事一樁。 聽完呢番說話信義妹開始斷斷續續有記低自己既往事。到高中時期，大家都交換日記, 又或者happy net， 但堅持的好少。 跟住就到 Xanga 時代了，大家開始會交換網上日記。又會將自己個版面 Set 得靚靚。當時同學話寫日記無咁易病，因為係渲洩的一種，回想起確實都係，信義妹有持續寫的時間，不論身心質素都比較好。後來到 Xanga 退位，就轉戰Yahoo Blog  啦！ Yahoo Blog 應該係最開心的時候，因為好容易搵到志同道合，blog 友間又會大家支持大家，出來 blog 聚就更加大陣象啦！想當年信義妹最期待係搞 Blog 聚 同出席 blog 聚。當時，不論分享喜怒哀樂，大家的回應都係包容，安慰同支持。 Yahoo blog的結束令到好多人婉惜同懷念，大家各散東西，後來到其他平台各有各寫啦～～～ 而近年信義妹對寫Blog 有新睇法。由於時代進步，掃墓都可以上網搞掂。所以話唔定日後真係會好似呢張網絡圖咁，係墳前掃一掃 QR code 就知道我的過往。咁而家自己寫，最少係最真實既感受，唔駛後來幫我整既人係度估估下究竟我係點。諗諗下呢個真係唔錯呀！