同上胎一樣，我打算喺QE生bb，所以一知道有咗唯妹，就即時去家庭醫生度驗孕同拎懷孕證明，然後登記去QE產檢。現時有3個方法可以向公營醫院登記產檢：   第一：「預約通」應用程式 呢個方法最方便，download個app就得喇！ 登記前要確保自己準備好 身份證 醫生出嘅懷孕證明 地址證明 準備好就可以開始登記喇，登記完等大約一星期，就有職員打俾我同我約期喇（等候時間不等，我聽過有媽媽等咗兩星期）。 第二：親身去醫院 如果住喺附近就當然可以親身去啦，記得要帶齊身份證、醫生出嘅懷孕證明、地址證明同伴侶嘅身份證副本！ 聽過好多媽媽問要唔要結婚證書，我嘅經驗係，上胎親身去，職員有問我拎另一半嘅身份證副本，但就唔使結婚證書，因為佢話「未結婚都可以生BB架」。 呢個方法最大嘅優點係可以即時約期，好人啲嘅職員仲肯盡量幫你睇吓有冇星期六嘅期添，方便在職媽媽（不過佢哋通常會話只此一次下不為例）。 第三：Fax去醫院 將身份證副本、醫生出嘅懷孕證明及地址證明 Fax去醫院產科，寫明係作登記產檢之用，記得之後補返個電話問吓收唔收到，職員稍後就會同你約期㗎喇！呢個方法我未試過，不過有媽媽話都好快有人打嚟約期。 下次再同大家分享產檢經歷   Please like our Facebook Page: https://www.facebook.com/weplaynlearn/ Follow us on our Instagram: http://www.instagram.com/kly.chu