其實由開始懷孕開始~各界人士都會好關心孕媽到底係順產定開刀? 去公立生定去私家生? 之後餵人奶定奶粉? 所以由懷孕開始外界已經俾緊好多無形嘅壓力俾孕媽~係呢到一媽就要同各位孕媽講~無論孕媽你嘅決定係點~ 只要呢個決定係令覺得舒服嘅~咁就可以~唔需要介意他人嘅意見同目光~   1. 順產vs開刀 首先其實而家係無一個好有力嘅醫學報告係證明到順產係對BB好啲嘅~ 而唯一能夠證實嘅就只有一個~就係順產係對母體復原比較好~ 所以一媽都幾推薦各位孕媽選擇順產~一媽係一一出世第二日傷口已經唔痛~ 排尿正常~仲可以落地行添啦~係一一12朝已經可以著返大肚前嘅褲~ 咁當然啦~待產嘅時候順產真係辛苦過開刀好多~一媽係凌晨2,3點開始陣痛~ 因為怕食全餐嘅關係所以就無打催生針~一直痛到當晚嘅7,8點一一先正式出世~ 各位孕媽係決定生產方式嘅時候可以參考以下嘅因素: 1 開刀比順產安全~除非孕媽對於麻醉藥/其他手術器具有敏感/有其他突發意外~唔係嘅話開刀發生意外嘅情況係比較低嘅 2 順產母體復原比較快~對日後修身餵人奶都比較好 3 順產就待產同生嗰時比較辛苦~開刀就係生完之後比較辛苦(話晒都係大手術)~ 4 由於各人嘅身體構造都唔同~開刀以後有可能以後都唔可以再順產~同埋可能唔可以生多幾個 (醫生術後會同你講~你係呢次手術之後可唔可以再順產~同埋之後你仲可以做多幾多次生產手術)   2 公立vs私家 係選擇醫院方面~一媽建議係量力以為~畢竟係私家生最平你都要預10萬蚊嚟找數~ 呢10萬用嚟請陪月~買補品一媽個人覺得比較值~如果孕媽你本身係公務員/公務員家屬/醫管局員工/家屬嘅話 公立絕對係一個非常唔錯嘅選擇~ 一媽同一媽嘅妹妹都係係私家出世~係20年前一媽嘅媽媽開刀生呀妹嘅時候~就已經係差唔多10萬~ 所以想去私家生嘅孕媽們就真係要儲定錢先啦~ 1 公立比私家平好多~公立大房一晚係120左右順產開刀同價無其他附加費~私家順產就3到4萬不等~開刀就5到7萬~視乎你住幾多日~有無擇日子~有無使用其他額外服務等 2 私家環境比公立好好多~就算大房都係好靜~而公立大房就比較嘈同埋空間都比較細~ 3 私家BB係住係BB房由護士照顧~餵奶先會將BB推返俾媽媽~公立BB就係放係媽媽隔離由媽媽自己照顧~除非你有特別情況護士先會叫你交BB到BB房由護士照顧(二等/頭等房夜晚除外) 4 私家無探病時間同人數限制~公立每日限2次探病時間~每次只可以入2個人~ 5 係私家探訪者只可以隔住塊玻璃睇BB~公立探訪者可以直接接觸到BB   3 人奶vs奶粉 呢個唔講所有人都知人奶對BB係最好嘅~但各位孕媽請記住~唔係一定要餵人奶俾BB先係好媽媽 由於每個人嘅體質唔同~再加上其他因素影響~人奶唔係個個媽媽都會有得俾BB飲~ 所以各位孕媽要記住一個最重嘅點~就係作為媽媽嘅我地首先要確保BB食得飽~ 至於係咪食得最好~係最基本嘅飽都未做到嘅時候~請問又有咩資格講好呢? 同埋作為80後嘅一媽同一爸都係飲奶粉大嘅(當年唔興餵人奶)~而家咪又健健康康~ 所以各位孕媽唔好俾咁多壓力自己~人奶呢家嘢同BB一樣~隨緣啦~ 就算你一滴人奶都俾唔到BB~都唔代表你唔愛BB~唔係一個好媽媽 如果你無奶又堅持一定要餵人奶~堅持唔肯補奶粉嘅~咁你先係一個狠心嘅媽媽! 見到自己個B愈嚟愈瘦嗰種感覺真係痛過生仔!!! 只要可以令BB健康成長嘅就係一個好嘅選擇 其他人無權利去指責媽媽~而媽媽亦都唔需要理其他無謂人嘅指指點點~