上一次二人行去旅行已是三年半前，超過1200天。上月農曆新年後，突然有個「很想抖一抖」的念頭，碰巧一張沙巴來回機票唔使500蚊，想了一天如何安頓小朋友，就扑搥吧！ 其實地點沒所謂，志在兩手揈揈。星期四晚上8點機，接兩個小朋友放學回家才去機場。實際只玩兩日，因為星期日早機，9點半便回到香港，下午還可以帶小朋友去街，perfect！ 冬末初春，要輕裝上機，去東南亞地方不會錯。沒帶小朋友，腳踢涼鞋上機，行裝就是一個手提喼和手袋，坐巴士去機場、過關行e道、晚餐食辣、不用節制飲咖啡......有太多久違了的事。   酒店最緊要地點方便，反正大部分時間外出，亁淨企理便夠，三晚酒店不用1000元。抵埗第二天坐船去了兩個外島花費400多元，另一天參加包午餐local tour去神山公園、吊橋、牧場，約600元。如果玩多一日，應該會去迪加島吧！ 其餘的錢都花在飲食上了。有一晚走去夜市，但感覺麻麻，只食了個海鮮冬蔭公、烤雞翼和甜品，又跑回去加雅街食。早餐都是食kaya toast、半熟蛋和叻沙，飲拉茶桔仔水，富源馮業怡豐都食過，各有特色但都係好味；肉骨茶叫到一枱都係亦不過70蚊；加雅街晚上變食街，烤蠔20蚊3隻、大蝦十零蚊、串燒2蚊串、蛋糕10零蚊一件、蠔餅20蚊、沙冰6蚊、雪糕10零蚊...... 有太多大件夾抵食的了。原本仲想去book cafe或october「文青」一下，但肚滿腸肥只想睡，急急行返去酒店覺覺豬了。 3500蚊，無多無少，坐埋25蚊grab去機場，剩返幾蚊雞，爸爸媽媽放大假閃遊之旅完美結束。   我FB：小寶帶爸媽去旅行(facebook.com/travelwithbobo)