上一篇先介紹完沙律B個bring list，今次要講下行程！ 沙律媽媽習慣左出門前要有行程，但湊住小朋友往往好難跟行程玩！ 今次沙律媽媽搭廉航，好辛苦，左轉右轉先上到機！ 由於第一次同沙律B搭廉航，以後都唔會再搭，怕左，勁辛苦！ 沙律媽媽搭廉航已經係2014年嘅事，好似無咁差，宜家係勁差！ 沙律B就係因為回程上落機時吹親，流左4日鼻水！ Anyway，講番個行程先！   第一日，星期五 [香港>東京] 早上7點左右已起身，final check 行李證件，8點離開屋企！ 由於當日係平日，撞左番工時間，所以要預早少少出門！ 早上11點準備depart，香港到東京成田落機要4H20M！ 因為廉航無野食，所以事先準備packed food，午餐，零食！ 下午4點到達日本，過關，換片，拎行李等等，出機場已經下晝5點幾！ 再轉Skyliner+地鐵，到左B&B (大久保區) 已經差不多夜晚7點！ 放低行李就落街搵食！食完搵超市買必需品 [蕃薯/雞蛋/水/菜/鮮奶]！ 基本上第一日已經無左！ 湊住小朋友，真係唔容易，加上東京嘅鐵路唔係個個站都有lift同elevator！ 又拎B車，又搬下行李，又換下片，又扭下計，又搵下車，又搵下路，用左成日時間！ 由香港屋企出發，door to door，用左10-11個鐘！ 好彩喺香港已經準備左蕃薯 (入暖壺)，喺飛機上當lunch，至少唔使餓成日！ 當沙律媽媽上一篇bring list被share出嚟，又俾好多人comment！ 有comment話沙律媽媽拎暖壺，packed food同零食係多餘，真係忍唔住笑左！ 原來佢地個小朋友(~2歲)可以由早上7點半飲完奶到夜晚7點之間可以唔使食野嘅！ 或者佢地個小朋友(~2歲)可以食飛機上嘅杯麵，外加可樂！ 試問又有幾多個擁有2歲未夠小朋友嘅父母明知舟車勞頓而咩食物都唔拎呀？ 第二日：星期六 [上野區 (動物園+atré Ueno+阿美橫丁) + 新宿區] 起身餵完奶，食完蛋，煮埋蕃薯，入暖壺，就出發上野動物園！ 地址︰東京都台東區上野公園9-83 [上野站落車，行過去，好快到] 營業時間︰09:30 – 17:00 [星期一休息] 票價︰成人600日圓， 0-12歲免費 入到園已經成11點幾，因為星期六，超多人，都算多野睇！有分東園同西園，小朋友真係可以睇大半日！ 平時沙律喺屋企成日睇埋啲動物書，今次見到真身，超開心！ 如果有小朋友同行，上野動物園係一個must-visit-spot！ 但園內野食唔太適合小BB食，連炒麵咸到極點！好彩都早有準備蕃薯俾沙律B充饑。 避免沙律B無啦啦扭計，一入園已買左一隻熊貓公仔，以備不時之需！ 結果真係起到大仔作用！但要視乎小朋友本身個性。 BTW，動物園提供租B車服務！ 動物園外邊，係上野恩賜公園，有好多大空地，好適合小朋友放電，附近仲有美術館！ 如果撞正櫻花開嘅月份，會超靚！但一定唔係3月頭囉！ 如果下次再去東京，沙律媽媽會選擇住上野呢區！ 除左滿足小朋友，當小朋友瞓左，就係大朋友嘅時間！ atré Ueno喺上野站上蓋，有野食，有野買！ 仲有隔離就係阿美橫丁，又可以行大半日，記住passport跟身 [退稅]！ 但當日推B車，shopping都係唔係幾方便！因為好多鋪仔都細細間！ 沙律媽媽嘅行程好hea，中途係要番B&B果種！ 一來，可以放低買左嘅野！二來，想沙律B poo poo！ 第一日己無poo poo，第二日無就會好大獲，呢個係湊便秘B之辛酸！ 所以沙律媽媽拎開奶茶，益生菌，prune果蓉是有原因的！ 之前有comment話呢幾樣野可以唔拎嘅時候，沙律媽媽真心覺得佢無知！ Anyway，好彩沙律B都poo左，谷左兩日，poo得好辛苦，仲有少少血絲。 沙律B有所出，沙律媽媽個daily checklist又多個tick！又可以開開心心去街！ 因為住東新宿，同新宿只係15分鐘路程，全程Google Map [Wifi蛋好重要]！ 出發前已搵左一間Shabu Shabu，喺新宿三町目站附近，真心覺得唔錯！ 地方闊落，見我地有B車，俾左一個靚位我地，唔使摺車都無問題！ 一家三口食得非常飽同非常開心，小朋友非常之適合！ 鍋ぞうNABEZO (Shinjuku-Sanchome) 地址︰8F Shinjuku Takano 2nd Bldg., 3-30-11 Shinjuku, Shinjuku-ku, Tokyo 路線︰新宿三丁見站，A5出口，步行1分鐘 營業時間︰11:30-15:00 (平日)，17:00-23:00 (平日)，周未/假期無落場時間 電話︰03-5363-4629   第三日：星期日 [墨田水族館 + 新宿區] 本應plan第2日去墨田水族館，第3日先去動物園的。好彩事先睇天氣報告，因為第3日落雨，要留守室內！ 而墨田水族館係一個超好嘅選擇！另一個must-visit-spot！ 墨田水族館位於東京晴空塔5樓，呢個大型商場超好行！ 出發前做下功課，就知道有超多適合沙律B食嘅餐廳，所以唔使自備野食！ 除左有得食，仲有得行，應有盡有，超正！沙律一家玩左一整日！ 墨田水族館 地址︰東京都墨田區押上壹丁目1番2號/東京天空樹城天空町5層6層 營業時間︰09:00 – 21:00 [全年無休] 票價︰成人2,050日圓， 3歲以上600日圓，0-3歲免費 路線︰東武天空樹線/東京Metro地鐵半藏門線/京成押上線/都營地下鐵淺草線淺草線押上天空樹前站，或者東武天空樹線東京天空樹站 [好易亂] 整個水族館，最有睇頭嘅就係企鵝同埋鯊魚，沙律B超開心！ 經常性自己走來走去，經常性自high，足足玩左成3個鐘！ 而沙律媽媽最鐘意嘅地方就便換片室，因為暖氣充足，超窩心！ 除左水族館，晴空塔仲有好多露天地方，好值得行！ 沙律B直頭一邊食蜜瓜包，一邊行，meanwhile又小跑一陣！ 總之就係勁開心！ 出發前打算去完水族館，(半藏門線) 半搭一個站去錦系町AKACHAN買BB野， 結果喺晴空塔玩到下晝6點！同埋開始落雨！ 於是離開晴空塔，番左B&B，成功催谷沙律B poo poo，大成功！ 夜晚又唔太願意留守B&B，行左去新宿三丁目一間24小時嘅Café。 間Café叫咖啡貴族，真係貴族的價錢，沙律爸媽是咖啡控，都想一試！ Café 內可以吸煙，呢個就係沙律爸媽最唔鐘意嘅地方！ 但咖啡就好好飲，cake就好一般，如俾小朋友食，cheesecake唔錯！ 第四日：星期一 [明治神宮] 本身打算玩豐洲+台場果一邊，但當日落好大雨，連門口都難出！沙律媽媽想去新築地同埋西松屋都無機會啦！ 等停雨，出得門口已是中午12點至1點，於是又留守新宿！呢個就係同小朋友出之不便，基本上咩都以沙律B為先！ 由於行程改左去明治神宮，就順便食埋Flipper’s，小朋友一定啱食！沙律B都食左一大塊！ 而附近都好適合小朋友行！ 仲俾沙律媽媽搵到間勁平嘅雜貨店，stuffed toys價錢300YEN+TAX！ 間雜貨店叫lelulaatikko，真係超平！ 由於零行程，基本上行到邊食到邊，又搵到間正野食dinner！餐廳叫山野愛子邸 (新宿)。 同B&B walkable distance！ 食呢間餐廳完全係因為外形夠吸引，同埋食物都適合小朋友。 真心推介！超抵食！環境又正！ 第五日：星期二 [東京>香港] 完全無行程，起身執行李，食完lunch出發機場！ 下午5點機，5H20M機程，到港已好夜，所以一定要自備野食！   後記： 上一篇bring list又俾Mamibuy share左出嚟！識睇一定睇comments！沙律媽媽最鐘意睇comments！ 當中有人話個list同沙律媽媽嘅差不多，有人覺得拎得太多！ 最印象深刻嘅係有一位話沙律媽媽拎咁多尿片/褲仔多餘。 帶夠上機，去超市買就得啦，橫掂都係訂日本片啦！仲有，唔使又片片又褲仔囉！ 呢句沙律媽媽深深覺得好笑，亦都笑左！ 首先，係香港訂果啲日本片片/褲仔 (M碼)，坐底50片一包！ 如果去到再買，即是回程要拎至少20條片片/褲仔回港！ 咁捉蟲嘅事，真係做唔出。沙律媽媽寧願拎2x條過去，回程剩2條！ 除非當地有細包裝，但沙律媽媽第一次同小朋友去東京，真係唔知人地有咩貨賣！ 亦都唔會上網睇下有咩片數嘅包裝，真係咁得閒咩！ 未生小朋友之前，唔會留意片片/褲仔，正如大部分男人唔會留意M巾同一個道理！ 或者，食開雪印，明治奶粉果啲都唔應該拎奶粉囉，真多餘！ #曲 同埋，識換片，換褲仔嘅爸媽都知道兩者之分別！ 分別再者可以唔除曬條褲，瞓低換！而後者就要除曬條褲，除埋鞋仔，企喺度換都得！ 東京咁凍，沙律媽媽真係將沙律B打平瞓低，拉低褲仔，幫佢換片！ 而唔係又除鞋又除褲幫沙律B換褲仔，當然亦要睇當時環境啦！ 仲有，講咩餐具呀，食物剪呀都唔使拎果啲父母，沙律媽媽覺得佢地教小朋友真係一流！ 因為佢地嘅小朋友 (~2歲)可以 (假設性) 用筷子食拉麵！勁！ 其實沙律媽媽想講，每對父母都有自己湊B嘅一套，會俾最適合嘅野俾自己個B！ 個個B都有佢地嘅模式，無話對與錯，只適不適合！ 完！！   嬰兒用品系列︰ 如何選購嬰兒用品の床品篇！ 如何選購嬰兒用品の初嬰服飾篇！ 如何選購嬰兒用品のSwaddle﹑包被﹑包巾﹑睡袋的重要性！ 如何選購嬰兒用品の消耗品篇！ 如何選購嬰兒用品の奶樽奶咀與配件篇！ 好物&癈物分享︰ 精明買物媽媽系列の嬰幼兒好物分享 III 精明買物媽媽系列の嬰幼兒癈物分享 II 精明買物媽媽系列の嬰兒好物大分享 II 精明買物媽媽系列の嬰兒癈物大分享 I 精明買物媽媽系列の平靚正收納妙法！ 精明買物媽媽系列の嬰兒好物大分享 I 旅行系列︰ 小腳板走天涯の18m布吉旅行應該帶啲咩？！ 小腳板走天涯の如何選擇旅行地點，機票，酒店同其他事宜？ 小腳板走天涯の10m台灣旅行應該帶啲咩！ 小腳板走天涯の23m東京旅行應該帶啲咩？！ 自家製系列︰ 自家製系列の給寶寶最好的護理—自製天然健康湯水！ 自家製系列の小兒天然止咳殺菌良方—燉紫洋蔥！ 自家製系列の打一歲針前應該煲咩儲涼湯水？！ 自家製系列の嬰兒都可以食嘅生日蛋糕—沙律B生日快樂！ 健康系列︰ 健康系列の如何應付寶寶の便秘問題？！ 健康系列の嬰兒應該打咩針?! 補咩針！！ 教育系列︰ 教育系列のPlaygroup 有感！ 教育系列のPN Interview 有感！ 生產系列︰ 生產系列の30分鐘生產過程+老公陪產的重要性！ 生產系列の早產嬰私院收唔收？生產費用又有咩唔同？！ 陀B系列︰ 陀B日誌の如何拆解超聲波圖！ 陀B日誌の公院私院產檢大不同！ 其他忙碌日常︰ 加固系列の嬰兒可以食咩零食？！ 暗藏細菌系列の選用沖涼玩具時要當心！ 沙律媽媽的忙碌日常の湊B去街應該拎啲咩？！ 純粹分享の在職媽媽補身恩物—老協珍熬雞精！！