話說前排小JM病豬，自然胃口欠佳，腸道亦不太暢通，攪到口仔都臭埋。 想話錫錫我都頂唔順，為咗令小主唔好再咁大口氣，唯有靠湯水幫幫忙。 今次又係時候出動素湯，幫小主清一清口氣啦！   材料： 穀芽　　　　適量 馬蹄　　　　五至六粒 炒麥芽　　　適量 紅蘿蔔　　　一條 紫花果　　　兩粒 粟米（連鬚）一條   做法： 1.) 先將穀芽、炒麥芽、紫花果及粟米鬚以清水浸泡。 2.) 紅蘿蔔洗深後切成小件，備用。 3.) 粟米一開四，備用。 4.) 將馬蹄洗淨去皮，備用。 5.) 預先煲滾水，再將粟米、 紅蘿蔔、馬蹄、粟米鬚放入。 　 再將穀芽及炒麥芽放入。 6.) 最後將紫花果加入，並轉細火煲一小時即成。 呢個湯比較清甜，小朋友唔會抗拒。而且湯料亦美味，明符其實好飲又好食！