仲有兩星期就係母親節啦，Ｓ媽媽生產完之後深深明白到做媽媽真係唔簡單，真係好偉大！！容許我大聲地對媽媽講聲：我！愛！你！希望你以後都快樂，安康！ 話說S媽媽懷孕嘅時候，一直都唔敢睇關於剖腹產子嘅片段...因為S媽媽真係好驚開刀啊，諗起要俾人劏開個肚就腳都震啦！ 好多人都認為開刀媽媽係輕鬆好多，因為唔使經歷十級痛！但我絕對可以同大家講：開刀媽媽都需要無比嘅勇氣，承受開刀帶來嘅風險同埋傷口帶來嘅痛楚！ 我記得喺開刀前六小時就要開始禁食，我仲記得自己前一晚特登食咗麻辣紅薯粉，仲食埋麥當勞（因為S媽媽整個孕期都無食過佢最愛嘅麻辣啊！跟著坐月又唔食得！）大概開刀前一小時，姑娘就拎左件手術袍俾我啦，我仲去埋poopoo，跟著叫S爸爸幫我影多幾張相留念添！S媽媽實在太唔捨得個巨肚啦！ T.T 之後就有手術室嘅員工推埋張手術床上嚟，直接上床然後同埋姑娘、老公落去手術室啦！ 首先係媽媽入咗手術室先，爸爸喺門外等候。麻醉科醫生同你解釋完少少打完針嘅反應（打冷震同發冷，個人係完全清醒，但下半身就無感覺）跟住就準備打果一支傳說之中好粗！好痛！嘅麻醉針啦！媽媽要先屈埋個身，好似隻蝦咁，有姑娘按住你身體。初初吉入去條尾龍骨嗰陣，我仲覺得：哦！都唔係好痛！但點知，越吉就越入，支針就越來越粗，仲要hold好耐添！打完隻腳好快就無感覺啦！之後兩隻手就大字型咁攤開，左手打點滴，右手就留返一陣俾老公拖住。 老公入到來，我個人就已經係咁震啦！然後我就感覺到醫生同姑娘喺我個肚上面整來整去，但唔痛既！不過都好驚啊，因為你會無限想像依家係咪已經打開咗你個肚呢？老公係咁捉住我隻手，係咁叫我唔使驚，我成身都好震，連講嘢都震。但我同老公講：我唔知係驚所以震，定係打完麻醉針嘅震！麻醉師就話係支麻醉針影響的！ 麻醉師一直企喺我左手邊, 個頭隔離，一路同我同醫生喺度講嘢，我諗佢係想分散我嘅注意力！到最後我感覺到有幾下張床搖得好犀利，連麻醉師都幫忙推左好多下。跟住醫生就同我講：恭喜晒!! 生左啦！ 呼~終於都鬆一口氣，助產士抱咗BB俾我睇。跟住S爸爸抱住佢，影咗我哋一家人第一張家庭照啦！ P.S. 小豆釘嗰陣好核突呀！成個發水麵包咁！仲有層豬油包住佢添！ 跟住你會聽到啲鉸剪聲，手術刀嘅聲音（哈哈, 係咪好驚呢）S爸爸就跟咗姑娘去剪臍帶，而我就被推上病房啦。嗰一日都係迷糊嘅狀態，我記得到夜晚開始可以飲水嘅時候，我仲係咁嘔返晒出嚟！係到第二日早上，開始飲返野，食米水先正常返！ S媽媽好叻㗎 ！第二日就忍痛地落床啦！之後果一個月，我個傷口都仲痛，所有動作都要好小心！ 果種陰啲陰啲嘅痛，我寧願一次過痛晒去, 好過攤開成個月咁痛！另外, 我一生完已經戴腰封，當每次要拆開個腰封時都要有種勇氣，因為個肚一鬆左，個傷口就輕輕郁都會痛呀! 仲有! 記得打噴嚏同咳時, 一定要按住傷口呀!! 所以我覺得順產媽媽同開刀媽媽承受嘅痛楚真係一樣㗎 ！真係要向所有媽媽致敬！特別係生第二胎嘅媽媽，要有無比嘅勇氣再次承受當中嘅壓力同痛楚?!! 老公們, 記得要錫老婆多D啦!!