梭羅魚又平又鮮甜，廿蚊一大盤有成二百條！ 營養豐富：高鈣、高蛋白質，對小朋友好有益！ 配以節瓜去煲湯，對清除臟腑燥熱、腸胃濕熱特別有效。 有人就話梭羅魚唔洗劏，但我就會選擇劏，乾淨啲，安心啲，又唔擔心煎煎下會爆肚，會苦。 梭羅魚處理方法: 可用剪或刀，斜切去頭及肚; 又或者好似我咁用手指係肚位擠啲腸出黎，然後向上拉連鰓一齊扯出。   材料: 1. 節瓜 2大個 2. 梭羅魚 1份 3. 豬腱 $20 4. 薑片 3-4塊 5. 滾水 2L   做法: 1) 節瓜去皮，切件，備用。 2) 豬腱洗淨，汆水，備用。 3) 梭羅魚用剪或刀，斜切去頭及肚。 或者用手指係肚位(圖中圈住的位置) 擠啲腸出黎，然後向上拉連鰓一齊扯出。 4) 梭羅魚洗淨印乾水，預熱鑊，下薑片將梭羅魚煎香， 之後放入煲魚袋後，放回鑊，立即倒入滾水，煮滾呈奶白色魚湯。然後加入節瓜及豬腱，以中火滾45分鐘，可下少許鹽調味，完成。