20190429 懷孕25週3     呢日番威爾斯覆診，神奇地今次預約時間10：45，但竟然好快11：30已經有得叫名見醫生循例聽胎心度肚size問下問題，好快俾埋抽血紙同藥單我就走得。 就係我等緊拎藥時，威爾斯有電話打俾我，叫我番一番上去見醫生。上到去直入番頭先醫生間房，原來係話番俾我知上星期嘅抽血結果，鐵個度由三月嘅23跌左得19，血色素都低過三月，所以建議我早啲入院輸鐵劑（ 靜脈注射嘅方式），咁就降低要輸血嘅機率。（上胎陀軒軒我入院輸過兩次血） 本身佢叫我依家就入院輸，話好快會搞掂，應該夜晚可以走得但會夜啲，不過我身上咩準備都無，所以就第二日朝早先入院輸。         20190430   懷孕25週4 呢日8點要到醫院，先係地下入院登記處登記左先，然後就上5f產前病房，交份文件俾姐姐然後坐低等姑娘叫我門口一間房問下資料、量血壓體温、磅重、度肚size、聽一聽bb心跳，然後姑娘會俾埋套粉紅衫褲同一隻杯仔驗小便，咁就入去姑娘安排嘅床位放低行裝，去洗手間換好衫驗好小便，咁我就開始番上床等.......... 十點半有抽血員黎幫我種豆 再等到12點，姑娘就拎左鐵劑黎開始幫我輸啦，500ml要輸一個鐘，點知..........     就係一開機開始，我就有感覺，覺得隻手種豆個位好痛好痛，同時粒豆個位腫起哂正當我想叫姑娘時，姑娘就番左黎，我馬上問佢咁嘅情況係咪正常，姑娘話唔正常！下一秒馬上幫我熄機同拆左粒豆，因為粒豆搞到我隻手腫左唔再用得，係姑娘一路幫我拆豆，我就開始眼花 其他姑娘都過埋黎，幫我不斷量住血壓，再有 Houseman過黎睇下我點，幫我種過粒豆，幫我吊鹽水（因為我血壓好低），大概眼花左十分鐘左右就無事嚕～ 姑娘較好部機，三分鐘量一次血壓，好啲就轉5分鐘一次。 我本身係窗口第二個床位，佢地轉埋我床位轉出去走廊 密切觀察。 之後就keep住一個鐘量一次血壓， 醫生話今日唔會再輸鐵劑，因為可能我係藥物敏感，所以出現眼花嘅徵狀。咁我成個下午除左定時有姑娘黎幫我量血壓就係訓攪休息玩下電話過     到5點有醫生再黎巡房，佢話見我血壓都仲係低（其實我本身不嬲都係偏低），所以建議我今晚留院一晚，但我本身預左即日走，同埋軒軒只係係四個月大時有一晚我唔係屋企訓之外就未試過唔係我同佢訓攪，所以我都直接同醫生講我想走，幸好佢都明白，所以我最後留到食埋晚飯八點後就出院啦。     希望黎緊今胎唔洗再入院啦                   產品試用/活動邀請/其他合作 歡迎聯絡：tanleesharon2004@yahoo.com.hk 謝謝 軒軒與小小b facebook page http://www.facebook.com/leessssfamily