分享3次不同嘅生產經歷，第一篇上集，生大哥哥全餐篇   由生第一個催生失敗開刀，到生第二個自然順產，第三個終於催生成功。 以三篇文章好好記錄下來！   第一篇上集，生大哥哥全餐篇   2013年夏天，Holden 喺我肚內39週，做咗最後一次產前檢查，所有嘢都好好只係照超聲波同度肚圍尺寸時估計佢出世應該有9磅幾。 亦因為咁健康院轉介咗我去威院再照一次超聲波....   照完後同樣話佢係大隻仔。 於是，醫生出過新一張催生紙俾我，講明6日內無任何動靜，就要準時40週入院催生，原有嘅催生紙係41週至催生，醫生表示41週至催生的話到時BB可能已經超過10磅，擔心我生得辛苦同時亦有一定危險性。   可能大哥哥喺我肚入面住得太舒服，果然足40週都唔願出嚟。 就係咁！我要催生喇，入院後再照一次超聲波，仍然話佢將會重9磅幾，所以都好肯定我一定要即日開始催生！   上午9:00入院，中午12:00入到候產室，經過各樣催生步驟，之後就係其中一項無咩媽媽提嘅人手穿羊水過程，醫生????????‍⚕️用一枝好似鈎冷衫嘅鈎針直接人手放入去鈎穿胎盤，過程無任何止痛直接釣（p.s.手勢好嘅醫生好快鈎到就唔會好痛，生HOLDEN算好彩只鈎一下就成功。但係如果遇到個新手醫生就慘啦，生妺妹嘅時候就係啦，鈎咗超過10次都鈎唔中痛到極點，之後妹妹編再講） 做完以上程序，我望下個鐘已經下午2點，漫長嘅煎熬正式開始。   催生藥力開始發作，不時出現一下下陣痛，全身不斷流出大量冷汗，當時威院因為通風系統問題無法提供笑氣，連房內空氣都不太流通。而我不斷發燒，姑娘好好不時幫我換毛巾。   望下個鐘下午3點正，過咗一段好長嘅時間之後再望鐘，3點02分！！！   點解呀?????  點解只係3點02分？？ 時間真係過得好慢下！   好唔容易等到探病時間到，但係探病時間過後，又得返一個人感受陣痛，加上四方八面嘅BB心跳聲同埋繼續發燒️！   時間一分一秒過去仍然不斷陣痛同發燒，已經見住幾個遲入嚟嘅準媽媽都推咗去生B，但係我仍然只開2度無進展。   到咗零晨2點都只開3度仍然發燒️，就喺呢個時候醫生終於出現啦，佢嚟話我知唔可以再等，因為燒咗好耐同已經無咩胎水叫我開刀。不過，最神嘅係呢位醫生望一望我個肚就話BB無可能有9磅，最多7磅幾。 (而HOLDEN 的確係7磅幾）神醫勁！   神醫對住姑娘話一路開唔到度數、水(羊水)又無又發燒，所以唔再等喇決定緊急開刀。 簽咗好幾張文件後，打埋電話俾爸爸就已經轉床落手術室。去到手術室麻醉科醫生幫我半身麻醉，隔咗一陣下半身已經無曬感覺同埋有非常嚴重嘅打冷震反應啲牙震到好似去咗北極咁，呢個時候産科醫生正式動刀，第一下落刀醫生問我覺唔覺得痛，震住話唔痛呀。(之後至知痛在明天） 成個過程唔痛但係又會感覺到有人係個肚入面推來推去搵緊嘢咁，大哥哥終於出世啦。 不過，因為我發燒️連佢都跟埋我發燒️，一出嚟只望一眼就被抱走咗啦，但係好彩當醫生數完綿花縫好傷口後，Holden 已經退咗燒可以同我一齊啦！   但係原來真痛在後，生完上到產後房仍然未知痛。但係藥力一過就痛到。拉捙皮肉嘅痛，由????面到外面都好痛。忍痛餵奶仍可以接受，但係開刀後被撕烈嘅痛，伴隨到拆缐嗰一刻。   其實重有生產後子宮收縮嘅痛都好痛。我更覺得生一個比一個痛。（生Holden 少少痛，生Jordan 係痛，生Adele 係極度痛！！）   生完大哥哥喺醫院瞓多4日正式出院，人奶之路亦已經正式開始.........   #之後 再有生二哥哥JORDAN同生妹妹ADELE 嘅經歷分享    請續 （中集）#生二哥哥順產編 「下1個post」  同埋  （下集）#生妹妹催生成功篇 「下2個post」   PS: 其實入渡秒如年嘅侯產室，係我一世都唔會忘記嘅經歷。因為嗰時入咗侯產室後就唔可以落床，準爸爸亦只可以探病時間嚟陪一陣，其他時間只有陣痛加埋其他準媽媽嘅慘叫聲，重有無數部BB心跳機嘅心跳聲陪伴住。   請「Like 」 FB: www.facebook.com/threekids.gloria   「Follow 」 IG: www.instagram.com/threekids.gloria . #全職媽媽#香港媽媽#一湊三#開刀#順產#催生#母親節#mother