「啾」的一聲，成為老母從業員已經成7個月咁耐。雖然時間忽忽流過，但係距離成為全能老母從業員⋯⋯就是無法到達的距離。專業操守欠奉，經常偷工減料，終日博老細鴻褔齊天，就係我嘅營運常態，還好老細運作一切正常，感謝主！ 開頭我以為老母呢份工好易打，抱下個仔，錫下個仔，到月尾打開手掌問財務部拎人工就係咁簡單：Easy Job! 點知真係辛苦過愚公移山。 D人成日都以為留係屋企做人老母 ＝ 少奶奶 錯哂！ 好聽D咪全職媽媽，母慈子孝囉，唔通同你講我份工係做牛做馬呀？！ 至於經濟方面，一年去少幾次日本都可以買到樓啦，你唔係以為生左件仲得閒去幾次日本嘛～ 咁咪慳好多囉！ 但老母從業員嘅職責好含糊，幾乎全世界任何事都關老母事，而且由於香港仲未為最低工時立法，所以老母工時仍然係24小時，但間唔中都要噤下手機，借下尿循，同埋Happy Friday！老母無得辭職，但都要叉電，都一樣有自己想做嘅事，間中要放下老母呢個GPS腳環。 這幾個月努力適應新生活，忙嘅時候忙，停下來時就只係想停下來，但一直好想建立老母以外嘅生活，所以好想開個BLOG，試下可唔可以建立老母以外嘅新領域。做老母好忙，我又好懶，希望一個星期出到一篇日誌，這是我今年給自己的功課。 大聲宣佈：老母有話兒 呢個俾我向世界中心呼喚痛！???? 嘅地方 #雖然只有我聽到呢個呼喚 已經俏俏成立左！