還記得第一次見到呢個到男仔，著格仔恤衫梳個蛋撻頭，心唸邊有人咁著衫架！一定係書蟲，我一定唔會鐘意佢，一定… 緣份的安排就係咁奇妙，上面講的就係Timtam仔爸爸，不經不覺我地拍拖已經有16年（冇錯我地係幼稚園識嘅！）今個月更係我地拍拖週年紀念（冇錯16年都仲記得！）真係唔數過都唔相信時間真係過得咁快！ 大家都知紀念日通常男方都比較善忘！今年 結婚紀念日 係平日，我好記得係星期四，星期一時我whatsapp老公，不如星期四去呢間餐廳食飯， 佢回覆：好！不過點解星期四食？ 好明顯佢唔記得左！ 終於到 拍拖紀念日，佢終於識補飛！帶左我去呢間餐廳食飯！事前佢冇同我講，所以我都唔知食咩的情況下，反而有連番驚喜！好想推介比大家！    原來呢間 Casa Pennington 出名係食 #生蠔！我同老公都好鐘意食生蠔，每次每人都可以食一打！可惜現正懷孕中，我無得食老公話生蠔真係好新鮮，我知我睇到，無奈要忍口，好彩湯終於送上，係 #黑松露野菌湯！芳香的黑松露係我至愛，加上香脆蒜蓉包，絕配！    主菜點左呢間餐廳signature dish, #意大利鴨肝炒意粉！餐廳主管話我地識食，呢個係佢地餐廳咁多年黎的 #招牌菜式！講真呢，係老公佢鐘意食鴨肝，我其實就麻麻的！不過經餐廳主管一講，又抱住試一試的心態，點知一食就明白點解咁多年都仲能夠成為招牌菜！鴨肝好肥美，甘香油脂佈滿全碟意粉，意粉炒得好夠火喉，分量兩人share食剛剛好不會太油膩，宜家一路打字我一路都回味緊！大家一定要試！    最後，我最期待的 #甜品，餐廳主管將甜品送上來時真係好大驚喜！原來碟上咁靚的圖案係出自佢手畫，佢話其實自己本身係個畫家黎！真係畫功了得！講返個甜品，其實我已經飽，唸住食少少試下就算，但個 #梨撻 實在太好味！梨鮮甜多汁，撻底又香脆可口，實在忍不住口！    捧住一個美味又甜蜜的回憶離開！望一望身邊呢個男人，16年的日子，除左令佢身上多左幾十磅脂肪、眼尾多左幾條魚尾紋外，回望一起走過的路還真不少！再過16年佢會變成咩樣呢？不過我相信無論再過幾多年，我都仍會記得佢那個著住格仔恤衫、梳個蛋撻頭的樣子，那將會成為我跟Timtam仔、妹妹還有我d孫，想當年的經典笑話！ ===================================== Facebook: Timtam仔的成長日誌  合作聯繫：Timtamfamily@gmail.com 駐站Blogger :  #Esdlife 靚太club #媽咪幫 Yahoo親子 #BK Milk #PressLogic 親子日常# ubaby Magazine #Beauty Exchange #ublog #hk01