中國人習俗，要懷胎三個月先至可以話比親友知，怕BB小器。我呢個P牌孕婦對於要食d乜、要做乜嘢檢查、睇邊個醫生好真係完全唔知道，又未可以問朋友，咁點算好呢？ 我今日就講下我搵醫生嘅經歷！ 當然係一無所知下，互聯網幫到你！通常forum 都會有好多媽媽介紹邊個醫生好，我花左幾日時間比較d comment，我就揀左一個比較多人話好嘅醫生睇，諗住診所係中環都唔會太差掛，點知個醫生同我講話佢乜都照唔到，而且講左好多唔好聽嘅説話，嚇到我爆喊。。 之後我再睇左三個醫生，最後我搵到劉醫生！ 點解我會揀劉醫生做我婦產科主診醫生呢？ 首先，我認識佢係因為我好多同事都係睇佢，劉醫生診斷時非常有耐性(因為我係一個特別緊張同特別多問題要問嘅人，好多醫生都頂我唔順)，不但有耐性，而且好風趣，令到我每一次去睇醫生，都會覺得好輕鬆。而且佢給我好多專業意見，好似我有胎盤前置，佢都會提議我返公立醫院生BB，因為公立醫院急救設施比較多，比較安全！我最鍾意嘅一樣野係，我每個月返去覆診，我都可以照超聲波見到蚊仔，有時蚊仔會用手遮住個樣，佢都好有耐性比時間，慢慢等蚊仔隻手拎開再照，同影相留念！ 最後，我都係搵劉醫生係私家醫院幫我接生，我係剖腹生產的，劉醫生手勢好好，開刀傷口好細好靚，位置好低，而且我復原得好好！ 其實除咗劉醫生好好之外，佢嘅團隊，好似麻醉科醫生劉醫生都十分專業，我生蚊仔時勁驚勁緊張，又怕痛，佢都會係我皮膚上打局部麻醉，之後拮針嘅時候就冇咁痛啦，特別係最恐怖打背脊嗰支麻醉針，打嘅時候我完全冇感覺，唔痛！而且仲會做手術前問定我想聽咩音樂，我仲叫佢整咗周杰倫啲歌俾我聽添！另外，佢介紹嘅兒科醫生陳醫生都好好㗎，生完蚊仔之後都係佢幫我睇住蚊仔啲黃疸指數，同埋詳細解釋血液報告俾我知，令我呢個P牌蚊咪非常放心，十分之好！ 搵到個好醫生，就會令自己懷孕過程好放心！各位孕媽媽加油呀！ Facebook Page: https://www.facebook.com/winstonandmami/