week 28 就無咩特別. 最特別就係我生日喇~~   week 29 6月10日: 入院一日. 早過自己返工, 又早過大少返工.. 晨早8點要返到聯合.. 張預約紙就寫明係上4B 產科病房既. 點知去到門口, 姑娘話要落B1辦入院手續先.. 所以同另一位媽媽遊返"車立"河去登記, 再上返4/F.. 入到去量血壓+磅重 (我2星期前產檢同今次竟然無重到 可能個磅有問題) 之後姐姐帶返房, 被安排床位. 已經見到有4位媽媽抽緊血.. 姐姐話枱面碗粥要抽完血先好食...咁就開始左一日抽4支血既活動喇!! 8點 -- 第一抽! 之後食早餐 (無味肉碎粥) 之後就無咩好做..同其他床位媽媽傾下計..因為我地幾個都係中左招先入黎... 食左大概1小時, 就去四周圍行下, 睇下野. 因為2小時後又抽架喇... 10點 -- 第二抽! 其實抽血姐姐D手勢都幾好. 又好人. 有講有笑. 又唔太痛.. 佢地仲好好人用幼針 之後派小食, 係一杯鈣思寶+麥包一片. 食左就瞓左一陣..只係半小時左右.. 就俾送餐姐姐叫醒, 12點食午餐!! 要好準時架. 因為2點又要抽血.. 呢餐個橙係唔食得住..要2點抽完血先可以食. 雖然好似無咩做過野. 但個人一得閒就唔知點解好易餓.. 食下食下..就食曬D餸...不過飯就無食曬既.. 之後又行下, hea 下. 傾下計... 我就落左地下門診拎藥單同藥. (事源係上次同醫生講好似有尿道炎, 就留小便種菌) 下午2點 -- 第三抽! 好唔想見到呢架車.... 抽完呢支, 就有個姑娘, 帶住D新人黎講下書. 話俾大家知咩係妊娠糖尿, 墳下問卷, 了解下點解會中, 有咩要注意等等.... 之後就食橙 食完橙仲有派小食噃~ 係2包梳打餅. 真係好多野食... 咁大家又傾下計, 瞓下, 食下野... 其實我就唔係好瞓到..因為醫院床好林........加上蓋佢張被, 唔知點咁.. 點瞓都唔舒服.... 到5點我開始好攰...朦朦鬆鬆瞓左半個鐘.. 6點, 姐姐又好準時黎派飯. 呢碟翠玉瓜就真係......一D味都無 但因為又開始餓, 所以又食下食下..食曬D餸. 為左唔超標, 飯都係無食曬... 食飽大家都唔敢鬆懈..係咁圍住4B房不停行!!!! 由6點25分, 企下, 6點45正式咁行下, 行到7點半, 再行下企下.. 一邊兜圈一邊睇到其他房有媽媽陣痛, 穿水... 都咪話唔驚..真係毛管都棟.... 真係唔知到時點算...... 到8點喇!! - 最後一抽就走人! 今次就唔好彩喇, 換左個黑面姑娘/姐姐黎抽. 係用針筒直接抽....有媽媽被佢抽手背, 手前臂... 我本身右手難搵血管, 但下午個姐姐一搵就搵到... 所以頭3次係係左-右-左咁抽. 打算呢次係右手. 但呢個姑娘係無耐性+黑面. 我都先俾左右手佢, 見到拍左幾下都搵唔到, 我就主動提議佢抽返左手啦. 我唔想抽手背. (但其實左手摺位已經有2個針窿喇) 佢支埋黎果下就知同朝早果3支唔同...係痛好多架..... 唔理喇..抽完, 我地就執野, 拎下次預約紙, 假紙走人... 大少都到左醫院接我. 我地就去食野... 當晚我仲因為好小事爆喊左.... 都係荷爾蒙衰......