【第一次出去玩Messy Play 】 咩係Messy Play？ 即係俾堆野佢哋自由發揮，唔限制佢點玩，可以俾佢哋慢慢嘗試、探索，刺激佢哋感官發展。缺點係通常都會整到好污糟。 　 喺媽媽谷見到人地去依個messy play玩啲相好靚，又可以一次性報名，所以試下。今次試依間感覺幾良好????????：入門口時有張注意事項要你簽名、父母&BB都會有label紙印咗名、所有人消毒雙手、BB要探熱。個人覺得似乎都幾仔細、幾謹慎。 　 唔知Big做咩等入場時好似都有啲肚餓燥燥哋咁，以為一入去就即刻開波messy play有得食野啦～ 原來都會有少少唱歌仔、拍拍手、玩彩虹傘、少少肌肉運動熱下身，咁又幾抵玩。 　 一見到彩虹傘出場Big唔知係咪有陰影，即喊（上次另一個playgroup玩依個時佢好驚）。因為１個老師對１０個學生，其實老師都無咩能力處理到喊嘅小朋友。加上現場其實係２老師２０家庭，成個環境都幾嘈????。人太多依點就係唯一比較唔好的。 　 然後Messy Play開波喇，總共有９個小攤檔： ⭕️啫喱珠珠 ⭕️紙條 ⭕️意粉 ⭕️沙 ⭕️水 ⭕️麥片 ⭕️薯蓉 ⭕️畫畫 ⭕️純食餅 一開波梗係衝去意粉booth，因為Big應該真係好肚餓。其實啲意粉係俾小朋友拎上手摸下個質感、可以用玩具刀切開之類，不過係可食用嘅，而Big就真係不停放落口食。 食完意粉，我哋就去玩薯蓉，Big又係自動波狂食，不過我哋試食完發現啲薯蓉好似咸咸哋（無向老師求證到底有無落鹽），即刻捉Big過隔離個水booth，唔俾再食。喺我仲未拎得切濕紙巾出嚟幫佢抹手之際，佢已經自行喺水booth洗手了.......之後佢就拍拍拍啲水，愈拍愈大力，拍到彈到成面都係水，啲水彈咗入眼，佢呆咗一呆。 　　 跟住濕淋淋去玩麥片booth，大人舀起少少啲麥片，然後倒返落嚟，啲麥片撞落個底啲鍚紙會有啲聲。出奇地，Big竟然無將啲麥片放入口，可能頭先已經食飽了。　  之後紙條booth係有好多唔同色又碎咗做一條條嘅紙條。玩紙條booth，俾呀媽整蠱，成堆紙條放上頭。 　 之後快速玩埋隔離個啫喱珠珠，因為驚佢放入口，所以玩咗幾秒就閃了。大概係咁啦，之後唱埋完場歌～大功告成，攰得我丫，仲要即刻幫你換埋衫褲先走。 全堂 1hr 15mins。$120。 有咁多款玩，算係咁。下次自己可以喺屋企玩下細規模啲嘅messy play，淨係俾一種材料佢試下。 　 #BigBig生活軼事 #BigBig的第一次 #messyplay #感官遊戲 #playgroup #遊戲