細佬最近幾個月去咗一個playgroup，導師每一堂都會教家長一啲遊戲，等家長返屋企可以同小朋友玩。以下總結幾樣比較容易係屋企做到嘅遊戲： 1。砌積木 砌積木對小朋友來講好重要，可以訓練手眼協調能力，可以訓練佢哋控制力度，訓練小肌肉。細佬砌到一舊積木唔跌嘅時候真係好有滿足感，笑得勁開心！ 2。炒鈕  將屋企收收埋埋嘅衫鈕放入一個碗度，最好有大大細細唔同size，俾隻佢食飯嘅匙羹佢，等佢喺度炒炒炒，訓練‘不’飯食嘅動作 。 （要睇實唔好俾佢將啲鈕擺入口） 3。玩cream  唔好以為每個小朋友都會鍾意玩cream！上次上堂嘅時候，導師喺每個小朋友身上倒左啲cream，有兩個小朋友即時大喊 呢個遊戲有咩意思呢？導師解釋，小朋友接觸唔同嘅質感，對刺激佢哋嘅觸感敏感度有好大幫助。呢個活動我哋喺屋企通常沖完涼玩，沖完涼整d cream係佢手手腳腳，等佢自己搽開，玩一輪先幫佢揸匀全身 4。蠟筆篤篤篤 呢個好簡單，買一盒唔易斷嘅蠟筆，準備一張白紙。導師教我地唔好拎住小朋友嘅手篤篤篤，只係喺佢面前拎住支蠟筆篤篤篤，等佢模仿呢個動作。 （睇住佢唔好俾佢咬蠟筆！） 5。小手指拎小物件 呢個遊戲主要訓練佢哋拎細細粒嘅嘢嘅時候，要用母指同食指呢兩隻手指，訓練佢哋嘅小肌肉同埋手嘅靈活性。家長可以先準備兩隻杯，一隻就空嘅，一隻入邊就可以放啲小物件，最好係唔同質感嘅，譬如係波子、衫鈕、化妝棉球、星星餅等等，然後小朋友就要從有嘢嗰隻杯，用母指同食指拎啲小物件去冇嘢嗰隻杯度。 6。爬行訓練 爬行嘅好處相信大家都聽唔少，我喺度就唔多講啦。導師提出嘅遊戲係安排小朋友爬係唔同質感嘅表面，可以係毛巾、硬地氈、軟地墊、紙皮箱、假草皮、沖涼房嘅防滑地氈等等。如果你屋企有一條隧道（例如ikea的玩具隧道），仲可以將呢啲唔同質感嘅物料鋪喺隧道入面等佢爬。 （可惜我家細佬唔鍾意爬，我哋近乎冇成功玩過呢個遊戲。。） 分享住咁多先，遲d上多幾堂playgroup，學多幾樣遊戲再分享 #一歲寶寶 #親子活動 #小遊戲 #playgroup #親子playgroup