1/7係變變變! Move生物體驗展嘅第一日，去之前已經預咗會多人 一早上網買定飛，去到現場攞飛。我哋買4:00-5:45pm嗰場。四點去到，門口人山人海。。。 攞飛嗰時職員話今日四點果場要延遲半個鐘先放人入去，不過就可以玩到7:45pm，職員話實玩得晒入面啲遊戲 4:30入到場，大部份遊戲都係排10-15分鐘就玩到，除咗扮企鵝（排咗50分鐘）。 場內好多影相位，好多展板介紹動物嘅資訊，排隊嘅地方都有展板可以一路排一路睇~ 第一個遊戲先玩扮圑子蟲，有工作人員會幫小朋友着果套蟲蟲外殼，跟住就可以爬大約2分鐘，影相效果唔錯，好搞笑 之後就係旁邊扮雙冠蜥體驗輕功水上飄，特製嘅‘水面’彈性好高，行係上面好搞笑，記住用slow motion影搞笑的video！呢個唔多人排隊，我哋排兩次～   之後去玩變身造獅子去捉斑馬嘅遊戲，呢個冇得換裝，純粹係睇住個mon，把握機會衝出去撳掣嘅遊戲。Natalie覺得好好玩，又玩左兩次～ 跟住就排重頭戲：扮企鵝！ 呢個真係好好玩，不過排50分鐘都有啲耐 （相信之後應該唔使排咁耐） 工作人員會先安排大家著好企鵝衫同帽，會預留時間比大家影相。 之後就要除帽，行幾級樓梯上冰山，然後扒底向下滑，不過因為阻力好大，其實係要用力向下爬 呢個好好玩啊，Natalie好想再玩多次，不過人龍仍然好長。。所以放棄左！ 前後總共停留左兩個鐘，Natalie覺得好好玩，細佬影咗一陣相就撤退咗 講返小小貼士俾大家參考下： 1️⃣雖然已經過咗early bird，不過預先上網買飛都平少少  （買飛傳送門：https://zukan-movehongkong.com） 2️⃣記住着對容易着、容易除嘅鞋因為除咗捉班馬遊戲，全部遊戲都要除鞋玩 3️⃣記住要着襪???? （冇襪唔俾玩扮蜥蝪輕功水上飄） 4️⃣場內唔俾推BB車 5️⃣如果父母都打算玩埋一份就唔好帶咁多身外物入去，因為扮企鵝、扮團子蟲同埋扮蜥蝪都要除晒身上嘅袋，放喺擺鞋嘅架上面 6️⃣遲少少、過咗最最最熱的熱潮先至去～少d人會更加好玩！ 趁暑假帶小朋友去玩啦，係一個好好嘅體驗！ 展覽日期： 2019.07.01 ~ 2019.10.20 時間： (i) 10:00am ~ 11:45am (ii) 12:00pm ~ 1:45pm (iii) 2:00pm ~ 3:45pm (iv) 4:00pm ~ 5:45pm (v) 6:00pm ~ 7:45pm #親子活動 #暑期活動 #室內活動 #生物體驗展 #輕功水上飄 #扮企鵝 #扮蜥蝪