一開始成為新手媽媽真係有無比壓力，因為育兒階段有好多事情要摸索同適應，仲要面對身邊好多三姑六婆既閒言閒語。   經常聽到某某長輩或老一輩既街坊對住我嗰女講「你咁大個仲成日痴住媽媽唔跟其他人，點得㗎！」，每次聽完個心都好唔舒服。 次次都想反問一句咩叫「點得㗎？」，禧家姐由岀世到而家都係由我貼身照顧，痴住媽媽係好正常，難度要痴住樓下個保安姨姨嗎？   每個小朋友係成長過程中都一定有「認人」呢個階段，打從六七個月開始佢哋會透過氣味同聲音去辦認主要照顧者, 會依賴照顧者慢慢去探索呢個世界，當遇到少見唔熟悉既人或者係覺得周邊環境有危險，佢哋當然係想捉緊令佢哋有安全感既照顧者，呢個都係好正常同自然既事！莫講話小朋友，我哋大人喺街上遇到唔熟悉既朋友或親戚，對方好熱情又攬又錫，都會覺得唔自然。加上往往呢啲長輩每次見到個小朋友都會用極度浮誇既表情去氹佢哋笑，佢哋好大可能會因為咁而嚇親，唔喊就奇，咁既情況更加想痴住照顧者。    我從來無擔心過我既小朋友會一直痴住我，佢哋慢慢長大，會發現呢個世界原來有好多野都比丫媽更吸引，分離焦慮自然就會消失，到時你想拖住佢手仔都唔係一件容易既事。雖然小朋友分分鐘都需要你既時候係有點困身，但其實我好享受被自己小朋友需要既時間，感覺好幸福，呢種被需要既階段，過左就無了。 所以，如果有媽媽有著同我一樣既經歷，真心覺得唔需要理會別人既閒言閒語，無建設性或者係聽完會影響心情既說話，左耳入右耳岀就可以了，太介意只會影響自己心情。 #三姑六婆 #閒言閒語 #分離焦慮 #認人   FB: 禧。熙。之生活點滴 https://m.facebook.com/heihei1619/ 聯絡Email: heihei1619@gmail.com 歡迎各位like&follow禧。熙。之生活點滴