其實已經參加完呢個活動成兩個禮拜，但之前去旅行，去完旅行兩位小朋友又病咗一路都未有時間將呢個咁好玩又有意義嘅活動介紹俾大家!! Anywayzz！ 講返個活動，呢個活動由心光盲人院暨學校旗下嘅Cedar Workshop主辦，主要係希望大人同小朋友透過煮嘢食嘅過程，了解到視障人士日常生活遇到嘅問題。 活動一開始，負責主持活動嘅視障人士先會講解平時我哋可以點幫到視障人士，例如喺街度見到視障人士也需要協助，我哋可以點樣引領佢哋行路等等~ 之後就到緊張嘅環節！ 大人細路都要戴上眼罩，矇住眼咁行入廚房、開始製作甜品！！唔好講話小朋友，其實大人矇住眼都有啲緊張 不過其實全程都有人係旁邊睇住，所以都好安全的。 第一個甜品係整香蕉蛋糕，材料同工具已經準備好晒擺喺枱面，係工作人員嘅提點下、同埋摸來摸去嘅情況下，我哋成功完成左個蛋糕，而且味道都唔錯㗎 完成呢個甜品就可以除眼罩，大家都鬆一口氣~ 重見光明！之後視障人士會介紹佢哋日常喺廚房用嘅工具，例如一啲會發聲嘅秤，幫助佢哋煮嘢食。 然後到整cream brûlée ，呢個唔使矇眼整，輕輕鬆鬆～   最後一個甜品係整Apple crumble，矇住眼切蘋果（當然由大人做啦)，我都好緊張???? 跟住喺等焗甜品嘅期間，我哋參觀左心光學校嘅圖書館，認識咗視障人士睇嘅點字書(原來一本書要變成點字書，會大本咗好多同厚好多），同埋一啲幫助視障人士閱讀、可以發聲嘅儀器。 最後就係返去享受我哋嘅甜品啦 臨走前，我哋仲買咗個扭計點知鎖匙扣 去完呢個活動之後，Natalie話好唔想睇唔到嘢。。所以！每次佢睇YouTube唔肯停嘅時候，我就會同佢講，睇得多電話會傷害眼睛㗎～～～ 嚟緊8月9號仲有一次黑麻麻煮飯仔嘅活動，有興趣就快啲報名啦，名額有限架! #親子活動 #cedarworkshop #黑麻麻煮飯仔 #有意義 #矇眼煮嘢食