自2月妹妹出世後係洛杉磯返香港後，今次再一次一家人旅行，地點係新加坡。出發前我每日都好擔心呢個trip會搞唔掂妹妹，因爲妹妹係名副其實大喊包，而且現階段處於認人期，平時除左我同工人姐姐之外，其他人一抱妹妹就會喊。最後整個旅程都比我預期好，大家都玩得好開心。 Day 1: 中午12點半機，我地今次係搭Singapore Airlines。一上機空姐就比左份小禮物Emma，係Dumbo油顔色套裝，Singapore Airlines真夠細心！ Emma自己拉住個行李仔周圍跑，睇得出個傻妹係好開心！   Daddy pre-order左baby bassinet比妹妹，我地食野時唔洗抱住妹妹。 落機加過關再返到酒店都差不多夜晚7點，check in後放低行李直接出去食飯。我地酒店係Marina Mandarin，位於市中心，就係地鐵Esplanade站，連接Marina Square Mall，非常方便！呢個Mall有MotherCare，假如帶漏野想買小朋友用品黎呢度就啱喇！ 酒店每間房都有露台，真係好舒服！ 間酒店好大好舒服，而且好乾淨，同小朋友去旅行住酒店最重要都係要夠乾淨。酒店可以提供BB床，有埋BB床上用品，不過我自己會帶定小朋友被仔。呢間酒店仲有間playroom比小朋友玩，但係唔記得影相。 Day 2 今日去朝聖魚尾獅Merlion，幾年前黎新加坡出Trip都無時間過黎打卡，今次點都要到！好熱好多人呀，仲要揹住妹妹，有時Emma又扭計要我抱，真係人都癲呀！不過呢度真係好靚呀！ 之後就去食亞坤咖椰吐司 Ya Kun Kaya Toast，同杯凍奶茶真係絕配呀！（張相得杯冰未倒奶茶落去） 之後起程去Marina Bay Sands，濱海灣金沙酒店，先係商場行一圈然後再上去頂層無邊泳池，嘆住個下午茶欣賞埋個靚景，雖然係好熱，但好唔捨得走。 剛好今晚預演國慶節煙花，為免同人逼，所以返酒店係露台舒舒服服咁欣賞，因爲間房個View係正正睇晒！ Day 3 一早起身去左聖淘沙，主要都係搭下纜車去左兩三個點行下影下相，因爲帶住兩位小公主係又熱又曬情況下確實好影響行程進度，到下午4點幾就回程返酒店休息，大家都已經筋疲力盡。 Day 4 今日回程返香港，同樣搭Singapore Airlines，空姐又係比左Dumbo油顔色套裝Emma，今次仲有Dumbo毛公仔，而妹妹都一樣有豐富Baby Food。上機前仲去埋機場個Jewel，入面個瀑布好大好壯觀，好值得去睇架！   總結：如果帶埋小朋友去新加坡，推薦大家住Marina Mandarin Hotel，房間夠大夠乾淨、整體環境好舒服，而且位置方便；同搭Singapore Airlines，服務質素高，飛機餐都算唔錯，有雪糕食，大人細路都鍾意！