細寶冬薑不知不覺已經三個月大，換句話說，我的「二寶媽訓練班」都上了三個月喇，人人話凑二件好勁，究竟有幾勁？大家一齊睇潛藏喺二寶媽體內嘅七不思議能力！ 一、移動偵測能力 細寶半夜冇喊冇叫地郁一郁都偵測到，即刻醒一醒望一望佢咩事。   二、夜視能力 半夜唔開燈係咁易睄一睄都知細寶有冇擘大眼，冇就由佢繼續瞓，有就起身抱起佢餵奶。 三、緝毒犬嗅覺 行埋BB床或者抱起聞一聞就知BB有冇痾屎。 四、無限供電及極速充電能力 點唔夠瞓都繼續半夜起身餵奶，繼續篤手機淘寶上facebook，然後恰返15分鐘就充滿電。 五、超級摩打手 一個typical嘅早上會係點嘅呢？ 大寶換片刷牙洗面，細寶爆片洗屁股換片衫換床單洗衫洗床單，大寶食早餐換片洗屁股，吸塵拖地洗廁所洗衫收衫晾衫摺衫，餵貓清理貓屎貓嘔吐物，埋身餵細寶掃風嘔奶換衫抹地爆片洗屁股換片換衫換埋自己衫洗衫。 六、忍痛能力 點攰點勞損腰骨點痛依然可以如常咁做所有照顧大細寶要做的事…最多臨瞓貼消炎止痛貼。 七、記憶立即刪除能力 咩都記唔到，我有一日連大寶返playgroup 都可以唔記得。不過正因為知道轉個頭會唔記得，動力十分強勁，所有事都即做！     冬甩冬薑媽媽—全職奴婢，照顧一家七口兩大兩小三隻貓，昔日無飯太太現自居合格廚娘。兩位寶貝女分別係：冬甩姐——四個月大時由全泵轉全埋身的樂天馬騮，冬薑妹——以逾4公斤重磅登場的感性吃貨紅髮胖胖豬妹子   想知更多冬甩冬薑的日常趣事，歡迎 follow 【小貓奴冬甩冬薑】 IG 和 FB 喔！ www.instagram.com/gingerdonutandcats | www.facebook.com/gingerdonutandcats