話咁快, 就黎到9個月!! 36週!! 好似一個創舉呀!   36w1d 上午同媽媽去聯合產檢, 做B鏈測試.  過程同平時一樣啦. 都係度高磅重驗小便. 唔知係唔係早上多手, 去左2次 toilet. 怕第一次唔夠尿, 將第二次少少尿倒埋一齊. 點知可能第二次小便有分泌, 令姑娘話我有少少蛋白尿..  佢話好少, 所以唔係再留小便 check.. 而體重方面, 我比上2星期重左0.8kg, 其實比我想像中少. 因為呢2個星期個肚大左好多..自己都覺得重左.. 不過原來都整體唔算重好多. 正常範圍!   今日約左11點15分. 第一次咁晏. 不過D人流得好快. 所以以為唔使等太耐. 點知..都係等左1個鐘15分鐘先叫名入去. 今次係要做B鏈, 所以上床前要除褲. 度肚聽心跳之後, 醫生就叫我腳板對腳板張開. 之後就用棉花捧"了"左陰道幾下 (講真, 係唔多舒服...) 再"了"菊花幾下.. 就完成了. (好彩唔使用傳說中既鴨咀)   上次醫生話攞私家份report 俾佢睇下個肌瘤. 我話私家醫生話唔見左, 呢個醫生就問本身幾大粒. 我答佢2cm. 佢即刻話. 好有可能無左, 因為子宮拉平左佢. 佢再睇下34w照果時阿B既 size (大左個多星期). 就話. 佢今次用手摸唔覺得咁大個噃. 之後又出返去約期. 2星期後, 38w 當日.    下午book左睇方醫生. 本來一開始係大少陪, 因為佢想睇BB. 之後話早走唔到要開會, 咁我就改早D搵媽媽陪 (佢好開心又有得去) 但係大少又話佢原來係早一日開會, 所以又可以去喇. 所以我又改返晏D, 5點, 等佢可以黎到. (媽媽又好失落XD) 最後, 大少都係趕唔到出黎. 我係自己入去睇BB既   今次BB個頭無大2星期喇. 頭同肚仔都係大左1星期, 腳就照樣長左2星期. 而重量方面, 去到2.7kg. 就快6磅. 整體比預產期大左1星期. 我心裡有個問題就係: 佢成長得慢左? 方醫生立即講返: 唔係~ 佢有跟返條生長線就可以喇. 之後我又同佢講覺得BB呢幾日無咁活躍了. 佢立即check 下臍帶有無問題. 有無繞頸, 供血狀況..等等..一切都係正常. 頭仔亦已經向下落多左少少. 但佢見我有D擔心, 就問我想唔想縛機睇下胎動同心跳. 我覺得橫掂自己黎. 好丫. 大少又未放工. 咁就入左另一間房去 check喇. 縛左BB心跳機同宮縮機. 再叫我feel到胎動就按一下制. 如是者大概20分鐘. 所有野都正常. 因為阿B又郁返多左 就係咁. 佢阿媽就俾左500去坐多20分鐘喇....   36w6d 今日終於都開始飲覆盆子葉茶 其實早幾個星期前已經買左. 不過一直未飲. 今日終於都飲.  聲稱可以到時順產有幫助..希望係啦~ 味道方面. 我又OK噃. 我係唔飲花茶果D人. 係中意飲傳統茶. 呢隻茶我可以接受到. 不過唔可以一次飲曬一杯. 應該會想嘔... 產品功能 ： 能夠幫助保持腸胃，呼吸道以及心血管健康，緩解痙攣症狀 。 能保護女性子宮，生殖系統功能。 可以緩解月經疼痛，且有健胃消食的作用。還可以補鐵預防貧血，對於腹瀉，牙周炎等也有很有幫助。 有助孕媽媽分娩：幫助加強子宮肌肉，和陰道彈性，有助於宮口打開. 適合女性，以及處於孕產期孕後期的孕媽媽，可幫助自然分娩女性。   使用方法 ： 平時保養，每天1包。每包可以沖5杯。 一般痛經女性，經期來前一周每天一包。 請準媽媽們從懷孕的36週請開始飲用這款茶。早晚飯後30分鐘各1包，每包沖泡1次，400-500ml水。預產期前一周喝更為有效 產後：可以和黑糖一起喝，幫助子宮收縮復原，快速排除惡露。