無論社會變得多麼醜陋、多麼紛亂，小朋友都應該有一個開開心心、充滿快樂回憶嘅暑假 今個weekend諗到去邊未啊？ 前幾日我哋就同左Natalie去愉景灣嘅Epicland玩。呢個唔係一般嘅playhouse，而係一個充滿歷奇活動嘅playhouse，挑戰你嘅體力同埋膽量！ 一入到場，已經見到超級高嘅彩虹滑梯，幾層樓咁高啊！估唔到Natalie同朋友仔一啲都唔驚，仲話好好玩好刺激，玩咗好多次！ 之後就爬咗入五層高嘅玩樂區！入面有各種各樣嘅關卡、攀爬設施，要你喺入邊擒高擒低，又有滑梯sir番落黎！去到玩樂區最高層，就有得玩射擊遊戲，無限量嘅海棉波波任你發射 大人同小朋友可以分別企喺兩邊對戰~  之後就去咗跳彈床同埋攀石！跳彈床真係好正， 連我都跳到High High地！攀石都幾考膽量㗎，因為真係可以爬到好高... 大家唔需要擔心安全問題，會着好晒裝備，而且亦都有工作人員喺度睇住㗎!  差啲唔記得講好好玩嘅飛索遊戲，飛索唔係好長，但速度感十足！兩個細路又係玩完又玩~ 如果夠高嘅話，仲可以玩埋leap of faith 同 Air Trek(空中漫步)! 空中漫步睇到都覺得刺激，要係幾層樓嘅高空行走同埋完成各種任務.. 玩到攰唔想擒上擒落可以喺地下打Golf~  我哋當日係帶埋細佬去玩㗎！咁細佬有咩玩呢？ BB亦都有2個啱佢哋玩嘅玩樂區：一個area有兩塊busy board，細佬可以瘋狂撳掣；另一個area就鋪晒軟墊，入面又有啲大大件嘅軟積木比佢哋玩，旁邊亦有波波池！所以細佬一啲都唔悶㗎！ 玩到又餓又攰，場內亦都有cafe，提供熱狗三文治等等嘅食物，亦有各種凍熱飲品。場內間Cafe有bb凳，餵細佬食嘢都冇問題! 其實Epicland嘅入場券係全日任玩㗎！只要你唔好除手帶，就可以出去食完野再入返黎繼續玩! 實用資料 ~Epicland地址：香港大嶼山愉景灣愉景北商場地下G31 ~開放時間:9:30-19:30 ~一日通行證收費 >週一至週五 兒童（1-8歲）：188元（1名成人免費陪同） 兒童（9-12歲）：188元 成人（13歲及以上）：200元 孕婦和老人（65歲及以上）：100元 >週六，週日，公眾假期和學校假期 兒童（1-8歲）：208元（1名成人陪同免費） 兒童（9-12歲）：208元 成人（13歲及以上）：228元 孕婦和老人（65歲及以上）：100元 ~交通： 最方便係係欣澳地鐵站出邊搭DB03P，直接去到愉景北商場！