呢個問題應該好多人都會問，包括我自己，我一開頭上網睇過其他媽媽既意見，雖然傳統規矩都係話未夠三個月唔講得，但又有人覺得呢D係舊一輩既諗法。最後得出黎既結論係, 講定唔講取決於準媽媽既心理質素。而我除左住埋一齊既長老同直屬上司之外，其他人都係選擇過左3個月先公佈，原因係我好驚青，當時未知BB有冇心跳，過唔過到唐氏，結構會唔會有問題等，越諗越擔心，所以決定叫Bibi爸都一齊忍口唔講。   屋企人 我係同長老一齊住，日頭我返工，夜晚係長老煮飯，佢地經常煲湯會落薏米，冇耐之後孕娠反應來料，一聞到屋企飯就想嘔，連廚房都踏入唔到，係隱瞞唔到既情況下就同左長老講有左，胃口差食唔到晚飯，所以唔洗煮我飯。頭3個月我每晚收工都閉關係房，外賣M記，KFC同譚仔酸辣米線，奇怪既係偏偏呢Ｄ又食得落口。 而我自己既屋企人就一個都冇講，佢地都係3個月後先知，原因係之前有屋企人流過既經驗，為免又多個人擔心同傷心，所以我等T21出左先公佈。   公司 香港在職媽媽都唔少，包括我自己，有左早D講早D保障自己呢樣絕對係真既，不過最重要既因素都係睇工作環境同自己健康狀況而決定，如果經常出Trip，返夜更，出入地盤，長時間企又或者要搬野既工作，一定要盡早通知公司，等佢地有好Ｄ既安排，免死金牌事小，陀得隱先係事大。好好彩既係我既工作都冇以上既問題，所以除左直屬上司知道之外，其他同事都冇講，公司人事部我都係過左3個月先遞交懷孕証明。   雖然好多人我都係過左3個月先講，但當我接近就三個月既時候，有一日茶水姐姐問我係唔係有左，我比佢嚇左驚，問佢點解會知，跟住佢同我講，我行路姿勢唔同左。ＷＯＷ，我只能夠講，有經驗既果然唔同Ｄ，重點係我唔覺自己行路唔同左，所以事實話我知唔需要特別收收埋埋怕人知，懷孕係一件開心事，有人問咪大方承認。我自己覺得如果收收埋埋搞到唔開心既話，情願早D同人分享，自己心情都會好D，身邊既人會就住你。成個孕期話長其實唔長架，有好多野唔洗憂慮太多，順其自然，提自己做個保持心境開朗既開心孕婦。