我好深印象我第一次搭飛機去旅行，係同男朋友去，結婚之後就係同老公去，生咗大女就約埋家人一齊去，一年一次旅行少不了，生咗細佬，一家四口都去過兩次旅行啦！今年4月仲約埋好朋友一齊去大阪親子旅遊，我地係第三次去大阪，可以話已經好熟大阪，但去咁多次有咩玩？ 今次我地去咗好多唔同嘅親子景點，第一次去未生小朋友，第二次去又帶住長老，去嘅地方的確有限，所以今次要改變行程啦！ 我地第二日就去咗海遊館，入面有好多唔同種類嘅海洋生物，真係令我大開眼界，芊嶠同劻霖都睇得好開心。 我地今次旅程預咗兩日係去京都，一日係去嵐山渡月橋，呢到有絕美風景，絕對係一個影靚相嘅打卡好去處！ 去得嵐山，一定要去埋坐嵯峨野觀光鐵道，鐵道係以舊式嘅貨車車廂改裝而成，好有feel，全程7.3公里長，可以欣賞沿途美景，如果櫻花期和紅葉期去坐，仲更加靚！ 說好的京都兩天遊，第二日梗係去和服穿著體驗啦！我一早網上預約咗心水和服租借店，此行帶埋芊嶠同劻霖，所以梗係要搵間有埋細路仔和服借㗎啦！我仲 book 埋和服店攝影師，佢地帶我地去咗一啲少人，又地道嘅靚景影相，真係好有紀念價值㗎！ 之後繼續行程，今次都有去神戶，帶住小朋友可以考慮神戶動物王國，呢到真係可以超近距離同動物接觸，有兔仔、貓仔，仲有鳥類動物。 可以咁近距離同鳥類接觸，真係令我大開眼界。 去到神戶，當然要食神戶牛，呢間我地嚟3次旅行，3次都係食佢，真係入口即溶，好味道！ 臨走前一日，我地就去咗萬博紀念公園，呢個公園有個太陽之塔景點，必定要嚟打卡喔！ 最重要係場內有個公園，有兩條長滑梯，我地係到玩咗一個鐘！ 旅程再豐富都好，吃喝玩樂之後都要好好休息，由其帶住小朋友，所以這次大阪自由行住宿方面我地就揀咗住心齋橋酒店，夜晚去心齋橋行街，食埋宵夜行返酒店都冇問題。 下年我地都會繼續遊日本，向東京進發。